DİM-də etimad böhranı: nəhayət kim cavab verəcək?
DİM-də etimad böhranı: nəhayət kim cavab verəcək?
AzTehsil.com xəbər verir ki, bu haqda təhsil eksperti Məzahir Məmmədli öz fikirlərini bölüşüb.DİM sədrinin son mətbuat konfransında səsləndirdiyi bəzi fikirlər yenə də ciddi rezonans doğurdu. Açığını deyim, mən də DİM - in fəaliyyəti ilə bağlı dəfələrlə sosial şəbəkədə fikir bildirmişəm, müxtəlif TV kanalları, saytlar və qəzetlərdən həmkarlar münasibətimi soruşub. Açıq şəkildə demişəm ki, DİM-ə son illərdə etimad sürətlə azalır. Bu etimad itkisi elə-belə söz deyil, statistika ilə də təsdiqlənir – son 3 ildə apeliyasiya şikayətlərinin sayı DİM tarixində antirekord kimi qeydə alınıb. Bu təkcə mərkəzin deyil, düşüncə tərzinin böhranıdır. Mən demişəm ki, DİM -in bunker müəllimləri ayrı-ayrı kurslarda uşaqlar hazırlaşdırırlar, Alternativ dərsliklər hazırlayır, o dərsliklərə əli çatmayan abituriyentlər yüksək nəticə göstərə bilmirlər. Buraxılış imtahanlarının dərslərin bitməsinə 12-14 həftə qalmış keçirilməsi hansı pedaqoji məntiqə sığır? Məktəblərdə buraxılış siniflərində dərs mühiti tamam pozulub, buraxılış imtahanı vermiş şagird hansı məntiqlə dərsə gəlsin?! Alman dilində imtahan verən şagirdinin biliyini İngilis dili üçün olan alətlərlə ölçürsünüz, apellyasiya şikayəti verən 10 min 980 nəfərin işini onların iştirakı olmadan tələm tələsik elan edirsiniz. Haqqını israrla tələb edən 2 məzunun balının 300 olmasını çətinliklə də olsa etiraf etdiniz. Alternativ dərslik məsələsində qanun pozuntuları aşkardır.
Bütün bu fikirləri mən sadə vətəndaş yox, "Məktəb guşəsi" jurnalı və saytının baş redaktoru olaraq əsaslandıraraq bildirmişəm. Ən ciddi tənqidlərimi də ölkənin aparıcı TV-lərində səsləndirmişəm. Kecirdiyiniz mətbuat konfransında iştirak etsəm sizdən soruşardım:
Məlekə xanım Abbaszadə, düz deməmişəm?!
Əslində, mən hələ ehtiyatla danışmışam. Bildiyim hər şeyi desəm, bəlkə də yer-göy qarışar. Sadəcə tərbiyəmiz, ədəblə davranmaq prinsipimiz bizi saxlayıb. Amma bu yumşaqlığımızı zəiflik sanmayın.
Əgər daha açıq və sərt müzakirə istəyirsinizsə, buyurun, Fərman Abdullayevin AVMA-nın son qurultayında səsləndirdiyi fikirləri tapıb rəy bölməsinə yerləşdirə bilərəm – hamı tanış olar.
DİM-in bəxti gətirib ki, ictimaiyyətlə və mətbuatla işləməyi bacaran Xanlar Xanlarzadə kimi bir əməkdaşı var. Onun tərbiyəsi, ədəb-ərkanı, mətbuat nümayəndələri ilə olan xoş münasibəti bəzi gərginlikləri yumşaldır. Amma bu o demək deyil ki, çılpaq həqiqətləri gizlətməliyik. İctimaiyyət susmamalıdır. Çünki təhsil ümumixalq işidir - bizim gələcəyimizdir.
