Gimnaziyanın valideynlərindən ETİRAZ
Respublika İncəsənət Gimnaziyasında təhsil alan şagirdlərin valideynləri bu gün etiraz aksiyası keçiriblər.
AzTehsil.com xəbər verir ki, Oxu.Az-a danışan valideynlər qeyd ediblər ki, İncəsənət Gimnaziyası 2024-25-ci tədris ili üçün əsaslı təmirə bağlansa da, heç bir bərpa-quruculuq işi aparılmayıb.
Valideynlərin sözlərinə görə, təmir müddəti bir il olsa da, real iş icra olunmayıb. Onlar qeyd ediblər ki, bu məsələ çoxsaylı şagird və müəllim kontingenti olan məktəbin təhsil işçilərini və valideynlərini aldatmaq deməkdir.
Şikayətçi valideyn Səbinə Abbasova qeyd edib ki, övladı təmirdən öncə sözügedən məktəbdə təhsil alıb:"Bir il müddətində hər hansı bir iş görmədilər. Ölkədə bir İncəsənət Gimnaziyası var. Bu məktəbə qarşı belə laqeyd münasibət göstərilməməlidir. Bizə deyirlər ki, narahat olmayın, təmir ediləcək. Amma ortada real addım atılmır. Çox nadir hallarda iki-üç usta görürük. İki-üç usta ilə bu məktəbi təmir etmək mümkün deyil. O ustalar da hər gün buraya gəlmirlər. Aidiyyəti qurumlar məsələyə laqeyd yanaşırlar".
Digər şikayətçi valideyn Gültəkin Cəfərovanın sözlərinə görə, uşaqları uzun müddət gimnaziyada səhər növbəsində oxuyublar:"Övladlarımız indi günorta növbəsində dərsə gedirlər, təhsil aldıqları məktəb isə çox narahat yerdədir. Orada qarışıqlıq və təhlükə çoxdur. Biz övladlarımızın normal təhsil hüququnun bərpa olunmasını istəyirik. Gimnaziya incəsənət sahəsində önəmli şəxsləri yetişdirib. Bizim bu məktəbi seçmə səbəblərimizdən biri də incəsənət sahəsinin olması idi. Uşaqlarımız rəqsi onlayn necə öyrənəcəklər? Onlar indi təhsil aldıqları məktəbdə dərsdən tamamilə soyuyublar, ruhdan düşüblər. Həm mənəvi, həm də maddi baxımdan çətinliklərimiz var. Ya məktəbin bərpa olunmasını, ya da bu profildə başqa məktəbin səhər növbəsində istifadəyə verilməsini istəyirik. Övladlarımız 189-190 saylı məktəbdə ikinci növbədə təhsillərini davam etdirirlər. Uzaq məsafədə yaşayan ailələr var. Axşam saat 18:00-da dərsdən çıxan uşaqlarımız, tıxacı da nəzərə alsaq, saat 20:00 və ya 21:00-da evə çatırlar. Bu isə onların təhsil keyfiyyətinin düşməsinə səbəb olur".
Valideyn Ləman Nuriyeva isə qeyd edib ki, gimnaziyada təhsil alan şagirdlər xüsusi qabiliyyətə malik olduqları üçün burada oxuyurlar:Mövcud vəziyyətin bir il davam etməsi onların öz sahələrində bacarıqlarını inkişaf etdirmələrinə mane olur. Gimnaziya ixtisasyönümlüdür, lakin burada təhsil alan şagirdlər köçürüldükləri məktəbdə ixtisas dərsi ala bilmirlər".
Məktəbəqədər və Ümumi Təhsil üzrə Dövlət Agentliyi (MÜTDA) məsələ ilə bağlı Oxu.Az-ın sorğusuna cavab olaraq bildirib ki, Azərbaycan Milli Konservatoriyasının tərkibində fəaliyyət göstərən İncəsənət Gimnaziyasının binasında bərpa işləri çərçivəsində layihə işlərinin təkmilləşdirilməsi mərhələsi artıq başa çatıb.
"Hazırlanmış müvafiq sənədlər aidiyyəti qurumlara təqdim olunub. Yenilənmiş layihə üzrə məktəb binasının əsaslı təmir-bərpa işləri müvafiq qaydada davam edir. Bu yenidənqurma işləri, gimnaziyanın tədris və yaradıcılıq mühitinin daha da yaxşılaşdırılmasına xidmət edəcək", - deyə məlumatda qeyd olunub.
