Professordan TƏKLİF: “Son zəng” məktəbin bufetində keçirilsin

AzTehsil.com - “Son zəng tədbirlərində kimlərinsə bu prosesdən qazanc əldə etməsi, sui-istifadə halları, eləcə də şagirdlərin gözü qarşısında sosial bərabərsizliyin nümayiş etdirilməsi uzun müddətdir ki, aradan qaldırılmalı idi”.

Bu fikirləri  açıqlamasında Azərbaycan, Rusiya və Türkiyənin iqtisad elmləri doktoru, professor Zahid Məmmədov bildirib.

Professorun sözlərinə görə, “Son zəng” tədbiri məktəbin özündə - məktəb bufetində və ya mədəniyyət zalında təşkil olunmalıdır:

“Həmin şagirdləri müəllimləri və yaxınları təbrik etməlidirlər. Yoxsa ‘Son zəng’i şəhərin mərkəzində, restoranlarda keçirmək nə verir axı? Kiminsə bu yolla qazanc əldə etməsi üçün belə bir mühitin yaradılmasına ehtiyac varmı. Bu istiqamətdə atılan addımlar doğrudur və yerindədir.

"Son zəng” tədbiri musiqili-bədii kompozisiyalar, məktəb daxilində hazırlanmış teatr səhnələri ilə müşayiət olunmalı, məzunlarla məktəb rəhbərliyi və müəllimlərin görüşü, eləcə də digər məktəblərdən gələn təbrik mesajları ilə tamamlanmalıdır.

Bütün bunlar sadəcə təmtəraqlı nümayiş üçün yox, məzunlara mənəvi təsir baxımından təşkil edilməlidir. Elə bir səhnə hazırlanmalıdır ki, şagirdlərə təsir bağışlasın. Bu, ‘Bir dövrün sonu və yeni həyatın başlanğıcı’ kimi təqdim edilməlidir. Tədbirdə onların məktəb illərində qazandıqları biliklər, yaşadıqları çətinliklər, sevincləri, dostluqları - yəni məktəb həyatının bütün rəngləri əks olunmalıdır”.

Professor Sovet dövründəki yanaşmalara da istinad edərək belə deyib:

“O vaxt uşaqlar səbirsizliklə Yeni il bayramını gözləyirdilər ki, ən gözəl teatr tamaşalarına baxmağa gedəcəklər. İndi də bu ruhda bir teatr hazırlanması mümkündür. Bu səhnəyə məktəbin ən təcrübəli, hörmətli müəllimi çıxmalı, öz xoş arzularını, tövsiyələrini və son sözlərini deməlidir. Onun çıxışı şagirdlərin yalnız attestatla yox, əxlaqlı və mənəviyyatlı şəxsiyyət kimi yetişməsinə yönəlmiş mesajlar daşımalıdır”.

Zahid Məmmədov qeyd edir ki, təəssüf ki, son illərdə bu tədbir bəzi şəxslərin tamahkarlığına, pul qazanmaq istəyinə alət olub:

“Əslində bəzi insanların tamahkarlığının qurbanı məhz şagirdlər oldu. Təəssüf ki, ‘Son zəng’dən şəxsi qazanc məqsədilə istifadə edən insanlar var idi. Nə qədər israfçılıq, qeyri-etik göstəriş vardı? Mən hesab edirəm ki, bu tədbirlər məktəbdə və ya mədəniyyət mərkəzlərində keçirilməlidir. Bu, həm daha təvazökar, həm də şagirdlərin xatirəsində mənəvi iz buraxan bir tədbir olar”.