![](/templates/everydayyeni/images/aygunbaner.png)
Şuşa Realni Məktəbi universitet və kollec səviyyəsində fəaliyyət göstərəcək
"Şuşa Realni Məktəbi Şuşanın həcm etibarilə ən böyük tarixi abidəsidir".
Bunu elm təhsil naziri Emin Əmrullayev bu gün Şuşa şəhərində Türk Dövlətləri Təşkilatı Təhsil Nazirlərinin VIII İclasından sonra jurnalistlər üçün keçirdiyi brifinqdə bildirib.
Onun sözlərinə görə, burada təmir yox, bərpa işi aparılır:
"Təmir işini də proqnozlaşdırmaq çətindir. Bizim planlamamıza görə, 2026-cı ilin sentyabrında burada təhsil başlayacaq".
Nazir qeyd edib ki, sözügedən məktəbdə incəsənət və mədəniyyət üzrə ixtisasların olması planlaşdırılır:
"Bu məktəb ali təhsil və orta ixtisas səviyyəsində təhsil müəssisəsi olacaq. Yəni bu təhsil ocağı orta məktəb olmayacaq. Təhsil müəssisəsində ali təhsil istiqamətində peşəkar kadr hazırlığı həyata keçiriləcək.
Ümumilikdə isə Şuşadakı bütün təhsil müəssisələrinin, o cümlədən bu məktəbin Qarabağ Universiteti ilə bu və ya digər formada əlaqəsi olacaq. Bu filial və ya kollec kimi təhsil müəssisəsi ola bilər. Qarabağ Universitetinin fəaliyyətini qaydaya qoyduqdan sonra sizə daha çox məlumat vermək imkanımız olacaq".