Autizm Maarifləndirmə Günü qeyd olunub

AzTehsil.com xəbər verir ki, Elm və Təhsil Nazirliyi yanında İctimai Şuranın üzvləri ilə 268 nömrəli Xüsusi Təhsil Məktəbində Autizm Maarifləndirmə Günü qeyd olundu.

2 aprel tarixində 268 nömrəli Xüsusi Təhsil Məktəbində Elm və Təhsil Nazirliyi yanında İctimai Şuranın üzvləri və Milli Məclisin deputatı Ceyhun Məmmədovun iştirakı ilə "Autizm Maarifləndirmə Günü" münasibətilə əhəmiyyətli bir tədbir keçirildi. Tədbirin əsas məqsədi autizm spektr pozuntusu olan uşaqlara cəmiyyətin diqqətini yönəltmək, onların təhsili və inkişafı üçün görülən işləri ictimaiyyətə çatdırmaq idi.

Tədbirdə Azərbaycan Respublikasının Milli Məclisinin deputatı Ceyhun Məmmədov, Elm və Təhsil Nazirliyi yanında İctimai Şuranın sədri Hikmət Əlizadə, İctimai Şuranın katibi Günay Əkbərova və Şuranın üzvü Sevinc Məhməliyeva, eləcə də müxtəlif qurumların nümayəndələri, pedaqoqlar və valideynlər iştirak etdilər.

Açılış nitqi ilə çıxış edən 268 nömrəli Xüsusi Təhsil Məktəbinin direktoru Farizə Teymurzadə məktəbin fəaliyyəti və xüsusi təhsilin əhəmiyyəti barədə məlumat verdi. O, pedaqoji heyətin xüsusi qayğıya ehtiyacı olan uşaqlara göstərdiyi diqqət və qayğının, onların inkişafı üçün tətbiq edilən müasir metodların vacibliyini vurğuladı.

Milli Məclisin deputatı Ceyhun Məmmədov ölkəmizdə xüsusi təhsilin inkişafı istiqamətində həyata keçirilən layihələrdən bəhs edərək, dövlətin bu sahəyə xüsusi önəm verdiyini bildirdi.

İctimai Şuranın sədri professor Hikmət Əlizadə isə çıxışında xüsusi təhsil sahəsində həyata keçirilən islahatların vacibliyini vurğulayaraq, cəmiyyətin bu prosesdə daha fəal iştirak etməsinin əhəmiyyətini qeyd etdi.

İctimai Şuranın katibi, inklüziv təhsilin inkişafına dair bir sıra layihələrə rəhbərlik edən Günay Əkbərova çıxışında xüsusi təhsilin cəmiyyətin rifahı üçün mühüm əhəmiyyət kəsb etdiyini qeyd etdi. O, müəllimlərin və valideynlərin üzərinə düşən məsuliyyəti vurğulayaraq bu sahədə maarifləndirmənin və peşəkar hazırlığın artırılmasının vacibliyini qeyd etdi. Elm və Təhsil Nazirliyi yanında İctimai Şuranın üzvü Sevinc Məhməliyeva inklüziv təhsil sisteminin təkmilləşdirilməsinin yalnız xüsusi qayğıya ehtiyacı olan uşaqlar üçün deyil, bütövlükdə cəmiyyətin sosial inkişafı üçün mühüm olduğunu bildirdi. 

Tədbir çərçivəsində valideynlər, pedaqoqlar, defektoloqlar və loqopedlər də müzakirələrdə fəal iştirak etdilər. Onlar autizmli uşaqlar üçün təhsil imkanlarının genişləndirilməsi, müəllimlərin peşəkar inkişafı və yeni metodların tətbiqi ilə bağlı fikir mübadiləsi apardılar. Valideynlər öz suallarını və təkliflərini səsləndirərək, xüsusi təhsilin daha da təkmilləşdirilməsi istiqamətində görüləcək işlər barədə müzakirələr apardıblar.