Ağdamda yeni məktəbin açılışı təhsilə göstərilən qayğının nümunəsidir - ŞƏRH
Prezident İlham Əliyevin sərəncamları ilə işğaldan azad edilmiş ərazilərdə qısa müddətdə quruculuq və bərpa işlərinin həyata keçirilməsi diqqət mərkəzindədir. Son dörd il ərzində bu ərazilərdə genişmiqyaslı yenidənqurma və abadlıq işləri sürətlə icra olunur. Vətəndaşların mərhələli şəkildə doğma yurdlarına qayıdışı plan üzrə həyata keçirilir, onların yaşayış şəraitinin yaxşılaşdırılması və sosial rifahının təmin edilməsi istiqamətində mühüm addımlar atılır. AzTehsil.com xəbər verir ki, bu fikirləri AZƏRTAC-a müsahibəsində ixtisas seçimi və gələcək karyera üzrə mütəxəssis, təhsil üzrə ekspert Ramin Nurəliyev bildirib.O vurğulayıb ki, işğaldan azad olunmuş ərazilərdə sürətli quruculuq və bərpa işlərinin aparılması Azərbaycanın iqtisadi gücünün bariz nümunəsidir: “Bütün sahələrdə olduğu kimi, təhsil istiqamətində də genişmiqyaslı işlər görülür. Sakinlərin keyfiyyətli təhsil alması üçün dövlət tərəfindən hərtərəfli dəstək göstərilir. 2020-ci ildən bəri həmin ərazilərdə məktəblər və uşaq bağçaları inşa edilir. Bu, dövlətin təhsilə verdiyi önəmin və xalqına göstərdiyi diqqət və qayğının göstəricisidir. Qısa müddətdə təhsil müəssisələrinin, o cümlədən ali məktəblərin və tibbi klinikaların fəaliyyətə başlaması, gələcəkdə tibb ixtisasları üzrə təhsil imkanlarının yaradılması həmin ərazilərdə həyatın bərpasına dövlətin xüsusi əhəmiyyət verdiyini sübut edir.”
O qeyd edib ki, Ağdamın Sarıcalı kəndində inşası tamamlanan və Prezident İlham Əliyevin iştirakı ilə açılışı həyata keçirilən ümumtəhsil məktəbi də təhsilə göstərilən qayğının bariz nümunəsidir: “Tarixən Qarabağın, Qafqazın mədəniyyət mərkəzlərindən biri hesab edilən Ağdam işğal dövründə tamamilə dağıdılmış və minalanmışdı. Hazırda həmin ərazilərdə minaların təmizlənməsi, həyatın bərpası və infrastrukturun qurulması istiqamətində mühüm addımlar atılır. Elektrik, qaz, su təchizatı, yol infrastrukturu və digər sosial təminatların bərpası ilə yanaşı, təhsil sahəsində də sürətli inkişaf müşahidə olunur. Belə genişmiqyaslı quruculuq və bərpa işlərinin qısa müddətdə həyata keçirilməsi Azərbaycanın iqtisadi gücünü və dövlətin xalqına olan diqqətini bir daha nümayiş etdirir.” – deyə Ramin Nurəliyev əlavə edib.
