Müəllimlərin Haqqı Kimlərin Cibinə Axır?
Müəllimlərin hüquqlarını müdafiə etmək, onların rifahını yaxşılaşdırmaq məqsədilə yaradılan peşə ittifaqları, təəssüf ki, bəzi hallarda müəllimlərin maraqlarına xidmət etmək əvəzinə şəxsi mənafelərə yönəlir. ATİAHİ-nin Lənkəran rayon şöbəsinə 15 ildən çoxdur rəhbərlik edən Qürbətəli müəllimin fəaliyyəti barədə yayılan narazılıqlar bu məsələyə yenidən diqqət çəkməyə əsas verir.
Rəsmi olaraq, ittifaqın rəhbəri xidməti avtomobil və sürücü ilə təmin edilib. Lakin maraqlıdır ki, indiyə qədər onu sürücü ilə görən olmayıb. Əvəzində isə müəllimlərin üzvlük haqqı kimi ödədiyi vəsaitlə bahalı avtomobillərin alındığı, hətta bu günə qədər təhsilə bir damcı da olsa faydası toxunmayan şəxslərin rifahının təmin edildiyi iddia olunur. Müəllimlər günün çox hissəsini ağır iş şəraitində keçirir, bir çoxları öz dolanışığını çətinliklə təmin edərkən, ittifaq rəhbərinin lüks avtomobil sürməsi və bahalı həyat yaşaması haqlı suallar doğurur. Daha acınacaqlısı odur ki, həmin avtomobilin yanacaq xərclərinin məktəblərdə işləyən xadimələrin maaşından tutulan pulla qarşılandığı bildirilir.
Müəllimlərdən tutulan 2%-lik üzvlük haqqı onların sosial müdafiəsinə yönəldilməli olduğu halda, bu vəsaitlərin şəffaflığı sual altındadır. Eşidilən iddialara görə, həmin pullarla Haftonidə İbadi istirahət mərkəzi (şəxsi) tikilib. Bu, müəllimlərin əməkhaqqısından kəsilən pulların necə və hansı məqsədlə xərcləndiyini açıq-aşkar göstərir.
İnsanlar təhsil sistemində korrupsiya və qanunsuzluqlara qarşı susduqca, bu kimi hallar davam edəcək. Müəllimlərin susqunluğu, onların haqqının necə istismar olunduğuna göz yumması, bu cür neqativ halların kök salmasına şərait yaradır. Təhsil işçilərinin rifahını qorumaq adı ilə qurulan təşkilatların əsl məqsədi sual altına düşüb. Vətəndaş cəmiyyəti və dövlət qurumları bu məsələyə diqqət yetirməli, ittifaqların fəaliyyətinə ciddi nəzarət tətbiq olunmalıdır.
Müəllimlərə xidmət etməli olan təşkilatların onların haqqını necə istismar etdiyini görmək hamımızı düşündürməlidir. Bəs görəsən, haqlarını yeyənlərə qarşı müəllimlər nə zaman susmaqdan vaz keçəcəklər?
