Deputatdan telefon qadağası təklifi.."Məktəblərin ətrafından qəlyanxanalar da yığışdırılmalıdır."

Şagirdlərin bilik qazanmaqdan yayınmasında əsas rolu mobil telefonlar daşıyır. Aktual olan bu problem həm də dərs zamanı istifadə edilərkən bir növ müəllimə hörmətsizlik kimi də dəyərləndirilə bilər. Milli Məclisin deputatı, Böyük Qurtuluş partiyasının sədri Fazil Mustafa bu məsələ ilə bağlı şəxsi feysbuk hesabında paylaşım edib. Aztehsil.com həmin paylaşımı oxucularına təqdim edir.

"QEYD

Fransada məktəblərdə mobil telefondan istifadəyə qadağa qoyulması təcrübəsi heç tərəddüd etmədən bizdə də tətbiq olunmalıdır. Fikrimcə Təhsil Nazirliyi dərhal müvafiq addım atmalı, fövqəladə zərurət olmadıqca məktəb ərazisində mobil telefondan istifadəni şagirdlərə qadağan etməlidir. Digər bir zəruri addım isə məktəblərin yaxınlığından qəlyanxanaların dərhal yığışdırılmasıdır. Bu məsələdə ictimaiyyətin, özəlliklə də valideynlərin dəstəyi vacibdir. Nəhayət ki, Fransada olduğu kimi, məktəblərdə mobil telefon əyləncəsindən kitaba dönüş hərəkatına başlamaq lazımdır. Rusiyanın Təhsil nazirliyi də bu cür qərər verilməsi barədə təşəbbüsü dəstəklədiyini bildirib. Yəni mənfi tendensiyaya qarşı bizim də vaxtında reaksiya verməmiz məqsədəuyğun olardı".