Uşaqlar və gənclərlə müasir vətənpərvərlik modeli ətrafında diskussiya keçirilib
Uşaqlar və gənclərlə müasir vətənpərvərlik modeli ətrafında diskussiya keçirilib.
AzTehsil.com xəbər verir ki, Ailə, Qadın və Uşaq Problemləri üzrə Dövlət Komitəsinin tərəfdaşlığı, “Azərbaycan Uşaqlarının İnkişaf Platforması” İctimai Birliyi və Uşaq Səfirlər Məclisinin birgə təşkilatçılığı ilə Milli Məclisin deputatı Hikmət Babaoğlu ilə “Zəfər nəsli və müasir vətənpərvərlik modeli” mövzusunda görüş keçirilib.
Görüşün məqsədi gənclər və uşaqlar arasında vətənpərvərliyin gücləndirilməsi, milli-mənəvi dəyərlərin təbliği və müasir vətənpərvərlik modelinin mahiyyətinin izahı olub.
Çıxış edən millət vəkili Hikmət Babaoğlu Azərbaycan gəncliyinin ölkənin gələcəyində oynadığı mühüm rolu vurğulayıb, Zəfər dövrünün yaratdığı yeni tarixi reallıqlar, qəhrəmanlıq nümunələri və gənclərin milli kimliyinin möhkəmləndirilməsində təbliğat işinin əhəmiyyətindən danışıb. O, həmçinin vətənpərvərlik ideologiyasının təkcə hərbi sahə ilə məhdudlaşmadığını, bu anlayışın təhsil, elm, texnologiya, sosial məsuliyyət və vətəndaş fəallığı kimi sahələri də əhatə etdiyini qeyd edib.
Tədbir zamanı iştirakçıların sualları cavablandırılıb, aktiv müzakirələr keçirilib.
