Çağırışaqədərki hazırlıq fənn kurikulumu müzakirə edilib
Azərbaycan Respublikasının Təhsil İnstitutunda təkmilləşdirilməkdə olan çağırışaqədərki hazırlıq fənn kurikulumunun müzakirəsi təşkil edilib.
AzTehsil.com xəbər verir ki, müzakirə görüşü Milli Müdafiə Universiteti, Azərbaycan Dövlət Pedaqoji Universiteti, Sumqayıt Dövlət Universiteti və Azərbaycan İdman Akademiyasının müvafiq kafedralarının müəllimləri və müəllif heyətinin iştirakı ilə keçirilib.
Görüşdə ARTİ-nin şöbə müdiri Mənsur Məhərrəmov təkmilləşdirmə prosesi haqqında məlumat verib. Çağırışaqədərki hazırlıq fənn kurikulumunu təkmilləşdirən işçi qrupunun üzvləri Rəşad İsmayılov, Ceyhun Məmmədyarov, İntiqam Əsgərov, Vasif Ramazanovu auditoriyaya təqdim edib.
Görüş zamanı işçi qrupunun üzvləri milli maraqlar, milli dəyərlər və dövrün hərbi reallıqlarının nəzərə alınmasının təkmilləşdirmə prosesində əsas istiqamət olduğunu qeyd ediblər.
Daha sonra görüşdə iştirak edən ali təhsil müəssisələrinin müəllimləri kurikulum sənədinə dair rəy və təkliflərini səsləndiriblər. Görülən işlərin əhəmiyyəti xüsusilə vurğulanıb, edilən dəyişikliklər iştirakçılar tərəfindən müsbət qiymətləndirilib. Yenilənməkdə olan məzmunun dərsliklərdə düzgün ehtiva olunmasının və fənni tədris edən müəllimlər tərəfindən şagirdlərə doğru şəkildə çatdırılmasının əhəmiyyəti xüsusi vurğulanıb.
