Nazir müavinidən AÇIQLAMA
Beynəlxalq səviyyəli festival artıq 5-ci ildir ki, ölkəmizdə keçirilir. Bu il tədbirdə 22 ölkə təmsil olunacaq. Festivalın rəmzi əhəmiyyəti ondan ibarətdir ki, Azərbaycanın Zəfərinin 5 illiyinə təsadüf edir və bütövlükdə Zəfərimizə həsr olunub.
AzTehsil.com xəbər verir ki, bu sözləri Elm və təhsil nazirinin müavini Firudin Qurbanov “STEAM Azərbaycan” layihəsinin təşkilatçılığı ilə Beynəlxalq STEAM Azərbaycan (SAF-2025) festivalında açıqlamasında söyləyib.
O bildirib ki, festivalın əsas məqsədi yaradıcı gəncləri aşkar etmək, onların potensialını üzə çıxarmaq və gələcək inkişafı üçün motivasiya formalaşdırmaqdır.
“Yarışmalar müasir dövrün tələblərinə uyğun olaraq ən son texnologiyalar istiqamətində təşkil ediləcək. Süni intellektlə bağlı layihələr, pilotsuz uçuş aparatları, süni intellektlə idarə olunan sualtı qayıqlar, eləcə də uşaqların proqramlaşdırma bacarıqlarını nümayiş etdirən müsabiqələr proqramda yer alacaq”.
Nazir müavini vurğulayıb ki, bu tip tədbirlər xüsusi əhəmiyyət kəsb edir, çünki ölkənin gələcək inkişafı məhz bu gün formalaşan yaradıcı gənclərdən asılıdır.
“Hər bir dövlətin uğurlu modeli yaradıcı cəmiyyət üzərində qurulur və belə cəmiyyətin aparıcı qüvvəsi yaradıcı insanlardır. Onların formalaşması isə məhz erkən yaşlardan başlayır”.
F.Qurbanov əlavə edib ki, festival çərçivəsində yarışların gedişatı izləniləcək və gənclərin nə qədər yüksək yaradıcılıq potensialına malik olduqları, müasir problemlərin həlli üçün hansı innovativ təkliflər təqdim etdikləri nümayiş olunacaq.
