Qarabağ zəfərinin beşinci ildönümünə həsr olunan "dəyirmi masa" keçirilib
Pedaqoji Universitetin Quba filialında Qarabağ zəfərinin beşinci ildönümünə həsr olunan "dəyirmi masa" keçirilib
AzTehsil.com xəbər verir ki, Azərbaycan Respublikasında “Konstitusiya və Suverenlik İli” çərçivəsində Pedaqoji Universitetin (ADPU) Quba filialında Qarabağ zəfərinin beşinci ildönümünə həsr olunan "dəyirmi masa" keçirilib.
Əvvəlcə ümummilli lider Heydər Əliyevin və şəhidlərin əziz xatirəsi bir dəqiqəlik sükutla yad edilib.
Azərbaycanla yanaşı, Pakistan, Qazaxıstan və Özbəkistan nümayəndələrinin iştirakı ilə keçirilən toplantını giriş sözü ilə açan Azərbaycan Dövlət Pedaqoji Universitetinin Quba filialının direktoru, qabaqcıl təhsil işçisi, fizika üzrə elmlər doktoru, professor Yusif Alıyev bildirib ki, tədbir yeni bir formatda təşkil olunub. Əvvəlcə filialın kafedra müdiri, siyasi elmlər üzrə fəlsəfə doktoru Sabir Şahtaxtının (Hacıyev) hazırladığı “Ulu Turanın həmrəylik notları” mövzusunda məruzə dinləniləcək, sonra mövzu ətrafında müzakirələr aparılacaq. Filialda davamlı şəkildə təşkil olunan, seminar, təlim və digər təhsil və maarifləndirici tədbirlər barədə ümumi məlumat verən direktor diqqətə çatdırıb ki, ümummilli lider Heydər Əliyevin müəyyən etdiyi dövlətçilik ideyaları rəhbərlik etdiyi təhsil müəssisə və peşəkar kollektiv üçün mənəviyyat mayakıdır.
Məruzədə Turançılıq ideologiyasının ortaya çıxması, XX əsrin əvvəllərində Osmanlı imperatorluğunun və Qacar Xanədanlığının qarşılaşdıqları sıxıntılar, o cümlədən Böyük İpək Yolunun tarixi, müasir dövrdə bu dəhlizin yenidən gündəmə gəlməsi, Türk Dövlətləri Təşkilatının ümumi liderliyi ilə Orta dəhlizin, o cümlədən Zəngəzur dəhlizinin Avrasiya üçün nəfəsliyə çevrilməsi, TRASEKA proqramından Zəngəzur dəhlizinə qədərki zaman kəsimində bölgəmizdə baş verən bütün proseslərə, həmçinin perspektiv layihələrə toxunulub. Monitor üzərində fərli dövrlərə aid xəritələr, sxemlər, real fotolar əsasında fikir və mühakimələrini əsaslandıran məruzəçi bildirib ki, hazırda ulu Turan coğrafiyasında sülh və inkişaf notları eşidilir. Türk dövlətlərinin ortaq milli sərvəti olan bu geosiyasi reallığın müəllifi, yaradıcısı və müdafiəçisi Müzəffər Ali baş Komandan İlham Əliyevin liderliyi ilə qəhrəman Azərbaycan Ordusunun qazandığı Zəfərdir.
Sonra professor Yusif Alıyev, Əl-Fərabi adına Qazax Milli Universitetinin professoru Aziza Koşerbayeva, Cizzax Dövlət Pedaqoji Universitetinin Rus dili fakültələrarası kafedrasının müdiri, pedaqogika elmləri üzrə fəlsəfə doktoru, dosent Cəlalov Marlen, Qərbi Kaspi universitetinin doktorantı, pakistanlı Şeraz Mahmood, Quba Rayon İcra Hakimiyyəti başçısının müavini Səidə Abasova, Azərbaycan Dövlət İqtisad Universitetinin (UNEC) Zaqatala filialının direktoru, dosent Raqif Qasımov, Quba rayonu Alekseyevka kənd Rəhman Məmmədov adına tam orta məktəbin direktoru, Sevil Allahverdiyeva məruzə ətrafından fikir və mülahizələrini bölüşüblər.
Bütün qonaqlar çıxışlarında qeyd ediblər ki, təqdim olunan məruzə qlobal prosesləri özündə əks etdirməklə bərabər ümumilikdə Quba filialındakı intellektual potensialın göstəricisidir.
Qeyd olunub ki, çətin və şərəfli yol keçərək təşəkkül tapan Türk Dövlətləri Təşkilatının onillikləri əhatə edən gündəliyi sülh, inkişaf və birgəyaşayış fəlsəfəsidir. Bu formatda inkişaf platformasının qurucusu 44 günlük Vətən müharibəsində qazanılan şərafətli Zəfərdir.
Çıxışlarda həmçinin Azərbaycan Respublikasında “Konstitusiya və Suverenlik İli” çərçivəsində Pedaqoji Universitetin (ADPU) Quba filialında təşkil olunan “Regionlarda ali təhsil: reallıqlar və perspektivlər” mövzusunda keçirilmiş V Beynəlxalq Elmi Konfransın yüksək təşkili və beynəlxalq ictimaiyyəti düşündürən mövzuların müzakirəsi qlobal təhsil sistemi üçün mühüm əhəmiyyət kəsb edir.
