Müəllimlik ixtisası üzrə qəbul planları kəskin AZALIB
-Nazirlik və təhsil müəssisələri arasında münasibətlər qanun çərçivəsindədir, nazirliyin akkreditasiya aləti mövcuddur. AzTehsil.com xəbər verir ki, bunu Milli Məclisin bu gün keçirilən iclasında “Ümumi təhsil haqqında” qanuna təklif edilən dəyişikliyin müzakirəsi zamanı elm və təhsil nazirinin müavini İdris İsayev deyib.Nazir müavini bildirib ki, bəzi təhsil müəssisələrində müəllimlik ixtisası üzrə planlar kəskin surətdə azalıb: “Ali təhsil müəssisələri keyfiyyətli təhsili təmin etməlidir. Bu təmin olunanda müəllimlərin işə qəbula müraciəti zamanı problemlər meydana çıxmayacaq. 2025-ci ildə müəllimlərin işə qəbulunda iştirak edən 65523 nəfərdən 13716 nəfəri orta ixtisas təhsil müəssisələrini bitirənlərdir. Kəsilənlərin də böyük qismi məhz orta ixtisas təhsil müəssisəni bitirənlərdir. Biz orta ixtisas təhsil müəssisələrinin optimallaşması barədə təklifləri hazırlayırıq. Bu təhsil pilləsinin təkmilləşməsi nəzərdə tutulur”.
