Gənclərin narkomaniyaya qarşı maarifləndirilməsi məqsədilə görüş keçirilib
Gənclərin narkomaniyaya qarşı maarifləndirilməsi məqsədilə görüş keçirilib.
AzTehsil.com xəbər verir ki, Azərbaycan Respublikasında “Konstitusiya və Suverenlik İli” çərçivəsində “Narkotik vasitələrin, psixotrop maddələrin və onların
prekursorlarının qanunsuz dövriyyəsinə və narkomanlığa qarşı mübarizəyə
dair 2025-2030-cu illər üçün Dövlət Proqramı”nın həyata keçirilməsi məqsədilə Dövlət Komissiyasının daimi fəaliyyət göstərən İşçi Qrupunun və Azərbaycan Dövlət Pedaqoji
Universitetinin Quba Filialının birgə təşkilatçılığı ilə “Narkotik asılılıq, onun psixoloji səbəbləri və ali məktəbdə görülməli işlər” mövzusunda tədbir keçirilib.
Əvvəlcə Humanitar və təbiət elmləri fakültəsinin dekan müavini t.f.d Mürvət Əliyev tədbirin keçirildiyi Azərbaycan Özbəkistan Türk dünyası Tanıtım və Kültür Mərkəzi haqqında ətraflı məlumat verib.
Tədbiri açıq elan edən filialın sosial və humanitar məsələlər üzrə direktor müavini p.f.d Aysel Şeydayeva qonaqları və tədbir iştirakçılarını filialın direktoru professor Yusif Alıyevin adından salamlayıb, filialda maarifləndirmə istiqamətində görülən işləri diqqətə çatdırıb.
Quba Rayon Polis Şöbəsinin İnspektoru, baş
leytenant Aynur Şahbazova çıxışında tədbirin keçirilmə zərurətini izah edib. Bildirib ki, qloballaşma çərçivəsində cəmiyyətin bir hissəsində deqradasiya prosesi baş verir, gənclər narkotik və psixotrop maddələrə meyl edirlər. Aynur Şahbazova çıxışında həmçinin Quba Rayon Polis Şöbəsinin rəisi polis polkovniki Mehman Əliyev və əməkdaşları tərəfindən mütəmadi olaraq rayonun ali və ümumtəhsil məktəblərində keçirilən görüşlərin əhəmiyyətini də diqqətə çatdırıb.
Mentis Psixoloji Nitq İnkişaf Mərkəzinin
rəhbəri, psixoloq Musa Məmmədzadə vurğulayıb ki, bu məsələlərdə əsas məsuliyyət valideynlərin üzərinə düşür. Cəmiyyətin bu bəladan qurtulması yolunda ən böyük dəstəyi isə elə gənclər verə bilər. Bu baxımdan belə tədbirlər önəmlidir. Bu tip görüşlərin gələcəkdə də davam edəcəyini düşünürəm. Narkomaniya bəlasına düçar olan insanların reablitasiya prosesləri vasitəsilə müalicə olunaraq cəmiyyətə qazandırılması üçün çalışmalıyıq. Tədbirdə məruzəçi qismində Narkomanlığa və Narkotik Vasitələrin Qanunsuz Dövriyyəsinə qarşı Mübarizə üzrə Dövlət Komissiyasının İşçi qrupunun Sektor müdiri Raqif Allahverdiyev çıxış edib. Raqif Allahverdiyev söyləyib ki, narkotik asılılıq dünyanın əsas problemlərindən biridir. Dünya təcrübəsində göstərilib ki, gənclərin bu barədə məumatlılıq səviyyəsi nə qədər çox olsa, nəticə o qədər yaxşı olar. Məruzəçi həm də qurumun bu günə qədər apardığı təbliğatdan, gördüyü işlərdən bəhs edib. Vurğulayıb ki, gənclər çox vaxt yeni növ narkotik vasitələr barədə məlumatsız olur və təsir altına düşürlər. Çıxışda sırf narkotik cinayətlərə görə məhkumluq həyatı yaşayanların, onla arasında qadınların sayı ilə bağlı stastistikalar açıqlanıb. Narkotik maddə istifadə edən şəxslərin görünüşündə baş verən dəyişikliklər, bu vasitələrin xarici görünüşü təsvir edilib. Vurğulanıb ki, narkotik vasitələr cinayətə təşviqdir. Həmçinin istifadəçilər arasında yayılan xəstəliklər, intihara meyillilik, aludəçiliyin fəsadları sadalanıb. Qurumun narkomaniyaya qarşı mübarizə məqsədilə xüsusi qaynar xətt yaratması, elə bunun nəticəsində həmin bəladan əziyət çəkən gənclərin könüllü olaraq məlumat verməyə meyillilikləri qeyd edilib.
Tədbir tələbələrlə sual-cavab formatında davam edib.
