ADPU-nun Quba filialında pedaqoji təcrübə hesabatı ilə bağlı görüş keçirilib
ADPU-nun Quba filialında pedaqoji təcrübə hesabatı ilə bağlı görüş keçirilib.
AzTehsil.com xəbər verir ki, Azərbaycan Dövlət Pedaqoji Universitetin (ADPU) Quba filialında 2024-2025-ci tədris ilinin pedaqoji təcrübə hesabatının yekunlarına dair iclas keçirilib. İclasda ADPU-nun Quba filialının direktoru professor Yusif Alıyev, filialın tədris şöbəsinin müdiri, pedaqoji təcrübə rəhbəri, metodistlər, kafedra müdirləri, pedaqoqlar və pedaqoji təcrübə komissiyasının üzvləri iştirak ediblər. Filialın Özbəkistan-Azərbaycan Türk Dünyası Tanıtım və Kültür Mərkəzində keçirilən iclası ilk olaraq komissiyanın sədri professor Yusif Alıyev açmış və gedişata uğurlar diləmişdir. Daha sonra Filialın Tədris şöbəsinin müdiri, baş müəllim Mələk Bağırova çıxış edərək bildirib ki, 2025-ci ilin iyul ayında filialda kadr hazırlığı aparılan İbtidai sinif müəllimliyi, Məktəbəqədər təhsil, Təhsildə sosial psixoloji xidmət, Riyaziyyat və informatika müəllimliyi, Riyaziyyat müəllimliyi, Tarix və coğrafiya müəllimliyi, Tarix müəllimliyi, Coğrafiya müəllimliyi, Sosial iş, Azərbaycan dili və ədəbiyyat müəllimliyi ixtisasları üzrə təcrübə hesabatının müdafiəsi keçirilmiş, təcrübə komissiyasının rəyinə əsasən tələbələr filialı bitirmiş hesab edilmişdilər. 2020-ci ildə təsdiq edilmiş təhsil proqramlarına əsasən filialda fəaliyyət göstərən yuxarıda qeyd olunan ixtisaslar üzrə buraxılış Yekun Dövlət Atestasiyası ləğv olunmuş onun əvəzinə tələbələr təcrübə hesabatını təqdim etməklə filialı bitirmiş hesab olunublar.
Onu da qeyd edək ki, artıq iki ildir bu qayda tətbiq olunur.
Daha sonra Pedaqoji təcrübə rəhbəri Şəhla Mədətova, Keyfiyyətin Təminatı Şöbəsinin müdiri, p.ü.f.d B/m Pərvanə Rzayeva, Baş müəllim p.ü.f.d Lətifə Cəlilova, Qabaqcıl Təhsil İşçisi, filialın baş müəllimi Eyvaz Şeydayev, baş müəllim s.e.ü.f.d Sabir Şaxtaxtı(Hacıyev), baş müəllim Vüsalə Kərimova və digərləri çıxış edərək öz fikirlərini bölüşüblər. Təcrübə komissiyasının üzvləri bu sahədə hələki bir sıra boşluqların, çatışmamazlıqlar olduğunu vurğulamışdırlar. Qiymətləndirmə meyarlarının dəqiqləşdirilməsi, hesabatın müdafiəsi ilə bağlı tələbələrin təqdim edəcəyi məlumatın qiymətləndirilməsi, onlara veriləcək suallar, standartlar barədə məsələlər ön planda olmuşdur.
Müzakirələr zamanı xüsusilə tələbələrin metodik hazırlığının gücləndirilməsi, dərs prosesində innovativ yanaşmaların tətbiqi və məktəb-müəllim əməkdaşlığının genişləndirilməsi istiqamətində tövsiyələr də qəbul edilib.
Nəticə etibarilə pedaqoji təcrübənin təşkilati tərəflərinin daha da təkmilləşdirilməsi, tələbələrin praktik bacarıqlarının yüksəldilməsi və ümumilikdə təcrübə prosesinin keyfiyyətinin artırılması əsas prioritet kimi müəyyənləşdirilib.
ADPU-nun Quba filialı pedaqoji təcrübəni yalnız tədrisin vacib tərkib hissəsi deyil, həm də gələcək müəllimlərin peşəkar inkişafı üçün mühüm mərhələ hesab edir.
Son olaraq layihənin filialda fəaliyyət göstərən strukturlarda müzakirəsi aparılaraq Filialın Elmi Şurasının müzakirəsinə çıxarılması məqsədəuyğun hesab edilib.
