ADPU-nun Quba filialında tədris ilinin ilk Elmi Şurası keçirilib
ADPU-nun Quba filialında tədris ilinin ilk Elmi Şurası keçirilib.
AzTehsil.com xəbər verir ki, Azərbaycan Dövlət Pedaqoji Universitetinin (ADPU) Quba filialının Elmi Şurasının 10 sentyabr 2025-ci il tarixində genişləndirilmiş tərkibdə iclası keçirilib. ADPU-nun Quba filialının direktoru, Elmi Şuranın sədri professor Yusif Alıyev çıxış edərək üzvləri, dəvət olunan müəllim və əməkdaşları salamladı. Yeni tədris ilində və şəxsi həyatlarında kollektivə uğurlar arzulayan sədr, ötən bir ildə qazanılan uğurları sadaladı, əldə edilən nailiyyətlərdən danışdı. Daha sonra professor Yusif Alıyev filialda açılacaq yeni ixtisaslarla bağlı məlumat verərək, qarşıdan gələn tədris ili ilə əlaqədar müvafiq tapşırıq və tövsiyələrini çatdırdı. Filialın gələcək inkişafı istiqamətində əməkdaşları daha da intizamlı, yenilikçi və məsuliyyətli olmağa dəvət etdi.
Sonra gündəlikdəki məsələlərə uyğun olaraq çıxış və hesabatlara başlanıldı.
Tədris şöbəsinin müdiri Mələk Bağırova “2024/2025-ci tədris ilinin yay semestrinin nəticələri haqqında” geniş hesabatla çıxış etdi.
Sonra İnformasiya Kommunikasiya Şöbəsinin müdiri Yusif Abayev 2025/2026-ci tədris ili üçün bakalavriat üzrə qəbulun, Tələbə, məzunlarla İş və karyera şöbəsinin müdiri Hikmət Musayev isə magistratura səviyyəsi üzrə və MİQ imtahanlarında filial məzunlarının nəticələri barədə çıxış edərək ətraflı məlumat verdilər.
Cari məsələlərin müzakirəsində Strateji məsələlər üzrə mütəxəssis, s.e.f.d. Sabir Hacıyev “ADPU Quba-2030” Strateji İnkişaf Planının (2025-2030)” son versiyası barədə Elmi Şuraya hesabat verdi.
Elmi şura “ADPU Quba-2030” Strateji İnkişaf Planının (2025-2030)” sənədini yekdilliklə qəbul etdi.
Daha sonra Tədris Şöbəsinin müdiri Mələk Bağırova 2025/2026-cı tədris ili üçün Filialın Elmi Şurasının, strukturların iş planlarının və akademik təqvimin təsdiqi barədə məlumat verib.
Elmi şuranın gedişatında filialda fəaliyyət göstərən Psixoloji dəstək xidmətinin fəaliyyəti haqqında filialın müəllimi Fatimə Qasımova hesabatla çıxış etdi.
Gündəliyə çıxarılan dinlənilmiş hesabatlar ətrafında əlavə müzakirələr aparıldı, bu məsələlərlə bağlı gələcəkdə daha səmərəli nəticələr qazanmaq üçün müvafiq qərarlar yekdilliklə qəbul edildi.
Qarşıda duran vəzifə və öhdəliklər bir daha Şura iştirakçılarının diqqətinə çatdırıldı, tədrisin keyfiyyətinin yüksəldilməsi ilə əlaqəli təklif və tələblər dinlənildi.
Sonda Özbəkistan Respublikası Fərqanə Vilayəti Müəllimləri Təkmilləşdirmə Mərkəzi tərəfindən “XXI əsrdə Dil və Ədəbiyyat: Yeni Yanaşmalar və Perspektivləri" mövzusunda iki qardaş ölkə arasında keçirilən konfransa verdiyi töhfələrə görə, təltif olunan ADPU-nun Quba filialının bir qrup əməkdaşına sertifikatlarlar təqdim olunub.
