Elmi Şura KEÇİRİLİB
AzTehsil.com xəbər verir ki, Quba filialının növbəti Elmi Şurası keçirilib
Azərbaycan Dövlət Pedaqoji Universitetinin Quba filialının Elmi Şuranın 11 iyul 2025-ci il tarixində genişləndirilmiş iclası keçirilib. Elmi Şuranın katibi Sevinc Babaşova çıxış edərək üzvlərin yetərsay olduğunu qeyd edərək iclasın səlahiyyətli olduğunu bildirdi. Sonra Elmi Şuranın sədri, professor Yusif Alıyev çıxış edərək üzvləri, dəvət olunan müəllim və əməkdaşları salamladı. Sonra sədr, professor Yusif Alıyev artıq ənənə halını almış ötən Elmi Şuradan növbəti Elmi Şuraya kimi olan uğurlu işləri sadaladı, əldə edilən nailiyyətlərdən danışdı. Daha sonra professor Yusif Alıyev qarşıdan gələn tədris ili ilə əlaqədar müvafiq tapşırıq və tövsiyələrini də bildirdi. Filialın gələcək inkişafı istiqamətində əməkdaşları daha da intizamlı, yenilikçi və məsuliyyətli olmağa səslədi.
Elmi Şurada “2024/2025-ci tədris ilinin yaz imtahan sessiyasının yekunları haqqında” Tədris şöbəsinin müdiri M.Bağırova, İmtahan Qərargahının sədri Y.Abayev və Apellyasiya Komissiyasının sədri N.Bayramova geniş hesabatla çıxış etdilər. Sonra Tədris şöbəsinin müdiri M.Bağırova Təcrübənin yekunları haqqında hesabatını iclas iştirakçılarına çatdırdı. Elmi Şura üzvlərinin suallarını cavablandırdıqdan sonra məsələ səsə qoyuldu və yekdilliklə qəbul edildi.
Sonda cari məsələlər, Strateji məsələlər üzrə mütəxəssis, s.ü.f.d. S.Şahtaxtının (Hacıyev) təqdim etdiyi “ADPU Quba-2030” Strateji İnkişaf Planına (2025-2030) əlavələr” paketinin hazırlanması, Filologiya kafedrasının baş müəllimi R.Sədullayevin hazırladığı “Xarici dildə işgüzar və akademik kommunikasiya” fənni üzrə proqramın müzakirəsi və Filialın Keyfiyyətin təminatı şöbəsinin baş mütəxəssisi Emin Yarməmmədovun təqdimatında 2024/2025-ci tədris ilinin yaz imtahan sessiyası prosesinə dair və təcrübədə iştirak etmiş tələbələr arasında keçirilmiş məmnunluq sorğularının nəticələri barədə məsələlər müzakirə edildi. Dinlənilmiş hesabatlar ətrafında müzakirələr aparıldı və müzakirə edilmiş məsələlərlə bağlı müvafiq qərarlar qəbul edildi. Qarşıda duran vəzifə və öhdəliklər bir daha diqqətə çatdırıldı, tədrisin keyfiyyətinin yüksəldilməsi ilə əlaqəli təklif və tələblər dinlənilib.
