"Təəssüf ki, məktəblərimizdə xoşagəlməz halların sayı artır"
"Təəssüf ki, məktəblərimizdə xoşagəlməz halların sayı artır" - Ceyhun Məmmədov
Bildiyimiz kimi, dərslər yalnız bir həftədir ki, başlayıb, lakin bu qısa müddət ərzində məktəbdə xoşagəlməz hadisələr baş verib. Məsələn, bir şagirdin bıçaqlanması və dərs zamanı nalayiq sözlərin işlədilməsi kimi hallar diqqəti cəlb edir. Bu kimi hallar isə valideynlər tərəfindən narahatlıqla qarşılanıb.
AzTehsil.com-n əldə etdiyi məlumata görə Redaktor.az-a açıqlamasında Milli Məclisin deputatı Ceyhun Məmmədov bildirdi ki, bütün bunlar deməyə əsas verir ki, məktəblərimizdə təlim-tərbiyə işini və psixoloji dəstəyi ən yüksək səviyyəyə qaldırmalıyıq.
"Təəssüf ki, getdikcə xoşagəlməz halların sayı artır və tez-tez məktəblərimiz müxtəlif qalmaqallarla gündəmə gəlir. Bu, ciddi narahatlıq doğuran məsələdir, çünki məktəblərimizdə xoşagəlməz hallar müşahidə olunur. Bu sahədə ciddi problemlər və çətinliklər mövcuddur və onların aradan qaldırılması üçün addımlar atılmasına ciddi ehtiyac var. Çıxış yolu məktəblərdə təlim-tərbiyə işinin daha da gücləndirilməsi və davamlı tədbirlərin həyata keçirilməsidir. Eyni zamanda psixoloji xidmətlərin də ən yüksək səviyyəyə çatdırılması vacibdir. Məktəb psixoloqlarının üzərinə böyük vəzifə düşür, xüsusilə böyük məktəblərdə onların sayını artırmaq və bu istiqamətdə mütəmadi olaraq tədbirlər görmək zəruridir", - deyə millət vəkili yekunlaşdırdı.
