Dərslər başlayır, çantalar AĞIR - TƏKLİF
Məktəblərin açılması ərəfəsində valideynləri ən çox narahat edən məsələlərdən biri uşaqlarda onurğa sağlamlığı ilə bağlıdır. Skolyoz və digər onurğa problemlərinin yaranmasında ağır məktəb çantalarının böyük rol oynadığı vurğulanır. Həkimlərin tövsiyəsinə görə, məktəb çantası uşağın çəkisinin 10 faizindən artıq olmamalıdır. Amma praktika göstərir ki, bəzi hallarda şagirdlərin çantalarının çəkisi 5–6 kiloqrama qədər yüksəlir.
Halbuki 1–2-ci siniflər üçün norma 1,5 kiloqram, 3–4-cü siniflər üçün 2 kiloqram, yuxarı siniflər üçün isə maksimum 4 kiloqram hesab olunur. Bu isə uşaqların bel və onurğa sütununa ciddi yük salır.
Məsələ ondadır ki, fənlərin çoxluğu və dərsliklərin sayı şagirdlərin gündəlik yükünü artırır. Bu baxımdan əsas sual belədir: məktəbdə gündəlik fənlərin sayı və dərsliklərin həcmi necə tənzimlənməlidir ki, həm tədris keyfiyyəti qorunsun, həm də uşaqların sağlamlığı zərər görməsin? Həmçinin, elektron dərslik və ya məktəbdə kitabların saxlanılması kimi alternativ yolların tətbiqi mümkünmü?
AzTehsil.com - n əldə etdiyi məlumata görə mövzu ilə bağlı açıqlama verən təhsil üzrə ekspert Ramin Nurəliyev bildiirb ki, bu, həqiqətən də ciddi məsələdir.
Onun sözlərinə görə, tədris ili müddətidə valideynlərin ən çox şikayət etdiyi mövzulardan biridir:
“Valideynlərin bu barədə narazılığı kütləvilik təşkil edir. Xüsusən də, aşağı siniflərdə dərs sayının, o cümlədən kitab, dəftər və əlavə vəsaitlərin çoxluğu istər-istəməz çantada ağırlıq formalaşdırır ki, bu da şagirdlərə çətinlik yaradır. Nəticədə bir çox xəstəliklər də yarana bilir”.
Mütəxəssis nəzərə çatdırıb ki, məsələnin tənzimlənməsi bir neçə halda mümkündür.
Onun fikrincə, orta ümumi təhsil məktəblərində dərs cədvəlini tərtib edərkən aşağı sinif şagirdlərinə 3 fəndən artıq dərs yazılmamalıdır:
“Normalda şagirdlərin bir günə 5-6 dərsi olur. Belə olan halda, şagird daha çox dərs vəsaiti və ləvazimatı aparmalı olur. Bəzən valideynlər özləri çantanı daşımalı olur. Direktor müavinləri diqqət etməlidir ki, gün ərzində 3-dən artıq fərqli fənn olmasın, 5-6 dərs varsa, bir fənn qoşalaşdırılsın və ya rəsm kimi fənn əlavə edilə bilər”.
Həmçinin, E.Nurəliyev qeyd edib ki, fənn müəllimləri dərslikdənkənar vəsaitlərin alınmasını şagirddən tələb etməməlidir:
“Bəzi hallarda fənn müəllimləri orta ümumi təhsil müəssisələrində dərslikdən fərqli olaraq köməkçi vasitə kimi Dövlət İmtahan Mərkəzinin sinif testlərini, kursların və ya şəxslərin əlavə vəsaitlərinivə ya şəxslərin əlavə vəsaitlərini almağı tələb edirlər. Təbii ki, köməkçi vasitələrdən istifadə gözəl təşəbbüsdür, lakin bu, şagirdin yükünü artırır. Fənn müəllimləri həmin vəsaitlərdən bir ədəd alıb çoxaldaraq kağız formatda hazırlayıb şagirdlərə verilməsində köməklik etməlidir. Bundan başqa, vəsaitlərin sinifdə saxlamılmasına şərait yaradıla bilər. Bunun üçün siniflərdə şkaflar yerləşdirilə bilər. Buradan bir sual ortaya çıxa bilər ki, vəsaitlər sinifdə qalsa, şagir ev tapşırığını necə edəcək? Müəllim həmin dərsdənkənar vəsaitlərin tapşırıqlarının həllini dərs müddətində təşkil edə bilər”.
