Xalq şairi Mirvarid Dilbazinin doğum GÜNÜDÜR
Bu gün Azərbaycanın ilk qadın Xalq şairi Mirvarid Dilbazinin doğum günüdür.
Yaradıcılığa erkən yaşlarından başlayan Mirvarid Dilbazi XX əsr Azərbaycan poeziyasının görkəmli nümayəndələrindən biri kimi tanınır. Onun “Qadınların hürriyyəti” adlı ilk şeiri 1927-ci ildə nəşr olunub. Ədəbi irsinə lirik, ictimai məzmunlu şeirlər, poemalar, pyeslər və uşaqlar üçün yazılar daxildir.
AzTehsil.com xəbər verir ki, Mirvarid Dilbazi həmçinin görkəmli pedaqoq və publisist idi. O, uzun illər müəllimlik etmiş, “Şərq qadını” jurnalında və Azərbaycan Elmlər Akademiyasının Əlyazmalar İnstitutunda fəaliyyət göstərmişdir. Xaqani Şirvani, Nizami Gəncəvi, Puşkin, Şevçenko, Marşak kimi klassiklərin əsərlərini dilimizə tərcümə edərək ədəbiyyatlar arasında körpü salmışdır. Onun şeirlərində qadın azadlığı, Vətən sevgisi, ana duyğuları və xalqın ağrılı tarixinin bədii inikası geniş yer tutur.
Azərbaycanın ədəbi və mədəni inkişafında xidmətlərinə görə “Əməkdar mədəniyyət işçisi”, “Xalq şairi” fəxri adlarına layiq görülüb, “Şərəf nişanı”, “Qırmızı əmək bayrağı”, “İstiqlal” ordenləri ilə təltif olunub. 2001-ci ildə vəfat edən Mirvarid Dilbazinin xatirəsi bu gün də ehtiramla yad olunur. Onun 100 illik yubileyi dövlət səviyyəsində qeyd edilib.
