İdarənin müdir müavini Qəbələdə bir sıra təhsil müəssisələrində olub

İdarənin müdir müavini Qəbələdə bir sıra təhsil müəssisələrində olub.

AzTehsil.com xəbər verir ki, ‎avqustun 8-də Şəki-Zaqatala Regional Təhsil İdarəsinin müdir müavini Hafiz Pənahov Qəbələ rayonunun məktəbəqədər təhsil müəssisələrində təşkil olunan bir sıra tədbirlərdə iştirak edib.

‎

‎İdarə müdiri əvvəlcə Qəbələ şəhər 1 nömrəli körpələr evi-uşaq bağçasının infrastrukturu, maddi-texniki bazası ilə tanış olub, müəssisədə təlim-tərbiyə prosesinin gedişatını izləyib. Daha sonra uşaqların iştirakı ilə təşkil olunan müxtəlif süjetli, rollu oyunlara tamaşa edib.

‎

‎Eyi zamanda müdir müavini Qəbələ rayon məktəbəqədər təhsil müəssisələrinin rəhbərləri ilə də görüş keçirib. Görüşdə uşaqların davamiyyətinə nəzarət, təlim-tərbiyə prosesinin keyfiyyətinin artırılması, həmçinin qida təminatı və təhlükəsizlik məsələləri müzakirə olunub. Hafiz Pənahov bağçalarda nizam-intizamın, pedaqoji nəzarətin gücləndirilməsinin zəruriliyini qeyd edib, keyfiyyətli məktəbəqədər təhsilin uşaqların gələcək təhsil həyatına əhəmiyyətli təsirindən danışıb.

Sonda bağça rəhbərləri tərəfindən səsləndirilən mövcud problemlər və təkliflər dinlənilib, çatışmazlıqların aradan qaldırılması üçün qarşılıqlı əməkdaşlığın və daimi nəzarətin əhəmiyyəti diqqətə çatdırılıb.

Müdir müavini daha sonra Qəbələ şəhəri Şirvan Bulqədirov adına 5 nömrəli tam orta ümumtəhsil məktəbinin 5–9-cu sinif şagirdlərinin iştirakı ilə məktəbin kitabxanasında keçirilən S.S.Axundovun “Qaraca qız” əsərinin müzakirəsində də iştirak edib. Şagirdlər hekayəyə dair fikirlərini yaradıcı şəkildə ifadə etdilər, obrazlar arasında maraqlı müqayisələr apardılar və əsərin əsas ideyasını müzakirə etdilər.

Interaktiv şəkildə təşkil olunan tədbirdə bədii ədəbiyyata maraq, mütaliə vərdişləri və estetik zövqün formalaşdırılması mövzusunda fikir mübadiləsi aparılıb. Bu kimi mütaliə saatlarının uşaqların yay tətili dövründə asudə vaxtlarının səmərəli təşkilinə verdiyi töhfəni qeyd edib və onların davamlı keçirilməsinin vacibliyini vurğulayıb.