Abituriyentlərin Diqqətinə
Abituriyentlərin ixtisas seçimi, onların gələcək peşə həyatı və karyera imkanlarını müəyyən edən ən vacib mərhələlərdən biridir. Bu seçim yalnız şəxsi maraq və bacarıqlara deyil, eyni zamanda əmək bazarının tələblərinə, maddi təminat gözləntilərinə, cəmiyyətin peşələrə yanaşmasına və hətta ailə-mühit təsirlərinə əsaslanır.
Bəs abituriyentlər ən çox hansı ixtisaslara üsttünlük verirlər?
AzTehsil.com xəbər verir ki, mövzu ilə bağlı redaktor.az-a açıqlama verən təhsil eksperti Rizvan Fikrətoğlu bildirdi ki, abituriyentlərin ixtisas seçimi zamanı üstünlük verdikləri sahələr hər il bir qədər dəyişsə də, ümumilikdə ölkəmizdə tibb, əczaçılıq, hüquq, informasiya texnologiyaları, informasiya təhlükəsizliyi, kompüter mühəndisliyi, biznesin idarə edilməsi, maliyyə, psixologiya, dövlət və bələdiyyə idarəetməsi, beynəlxalq münasibətlər və müəllimlik ixtisasları xüsusilə də II qrup üzrə müəllimlik ən çox maraq göstərilən sahələrdir. Onun sözlərinə görə, bu marağın səbəbləri müxtəlifdir:
"Əsas səbəblərdən biri əmək bazarında tələbat və iş imkanlarıdır. Abituriyentlər və valideynlər daha çox iş tapmaq ehtimalı olan sahələri seçməyə çalışırlar. Tibb və IT sahəsində qlobal və yerli miqyasda kadr çatışmazlığı bu sahələrdə iş imkanlarını artırır. Maddi təminat baxımından maliyyə, hüquq, IT və tibb sahələrində əməkhaqlarının yüksək olması da marağı stimullaşdırır. Bununla yanaşı, sosial status və nüfuz məsələsi də seçimə təsir edir. Həkim və hüquqşünas kimi peşələrin cəmiyyətdə nüfuzlu sayılması bu sahələrə yönəlməni gücləndirir. Xaricdə təhsil və iş imkanları baxımından isə beynəlxalq münasibətlər, IT və psixologiya sahələrinə maraq daha çoxdur. Bu ixtisaslar üzrə xarici universitetlərə qəbul və beynəlxalq şirkətlərdə iş tapmaq daha asan hesab olunur".
Müsahibimiz qeyd etdi ki, cins fərqliliyinə görə də seçimdə fərqlər müşahidə olunur:
"Qızlar daha çox müəllimlik və psixologiya sahələrinə, oğlanlar isə mühəndislik və IT sahələrinə üstünlük verirlər. Eyni zamanda, bəzi abituriyentlər seçim zamanı şəxsi maraq və bacarıqlarını deyil, yalnız topladıqları balı və ya ailə-mühit təsirini əsas götürürlər. Bu isə gələcəkdə peşəyə uyğunluq və iş məmnuniyyəti baxımından problemlərə səbəb ola bilər".
