Xəbərlər
24 iyun 2017
5 471
Publik hüququ şəxs statusu nə əhəmiyyət daşıyır?-ekspert rəyi
Nadir İsrafilov: "Universitetlərin struktur, idarəetmə, göstərdiyi xidmətlər, təşkilati, maliyə, və digər Nizamnamə məqsədləri, tələbləri və şərtləri ilə tanış olduqdan sonra nəsə bir konkret və qəti fikir söyləmək olar”.
"Belə bir addımın atılması ilk növbədə idarəçiliyinin təkmilləşdirilməsinə, rasionallaşdırması və optimallaşdırılmasına xidmət edir”.
Bu fikirləri təhsil üzrə ekspert Nadir İsrafilov Prezidentin sərəncamı ilə təsdiq edilən "Azərbaycan Respublikasında təhsilin inkişafı üzrə Dövlət Strategiyası”na uyğun olaraq, ali təhsil müəssisələrinin publik hüquqi şəxs statusuna malik olmasının yarada biləcəyi nəticələri şərh edərkən açıqlamasında qeyd edib.
Xəbər verdiyimiz kimi Prezidentin sərəncamı ilə "Azərbaycan Respublikasında təhsilin inkişafı üzrə Dövlət Strategiyası” təsdiq edildi. Qeyd olunub ki, bu qərar ali təhsil müəssisələrində idarəetmənin keyfiyyətinin artırılmasında maraqlı tərəflərin - ictimaiyyətin, işəgötürənlərin bu prosesdə iştirakını daha da genişləndirəcək, şəffaf və səmərəli idarəetmə mexanizmləri yaradacaq. Həmçinin Təhsil Nazirliyindən də bildirilib ki, ali təhsil müəssisəsinin publik hüquqi şəxs statusuna malik olması onun müxtəlif mənbələrdən istifadə olunmaqla təhsili maliyyələşdirmə mexanizminin təkmilləşdirilməsinə, göstəriləcək ödənişli təhsil xidmətlərinin çeşidinin genişləndirilməsinə şərait yaradacaq.
Publik hüquqi şəxs statusu ali təhsilin inkişafı sahəsində hədəflərə çatmaq üçün hansı yeni imkanlar yaradacaq?
Nadir İsrafilov: "Təhsil haqqları ilə əlaqədar ödənişlər qaldırıla bilər ki, bu da müəyyən fəsadlarla müşayət oluna bilər”.
Növbəti aylarda və ya illərdə bir sıra digər universitetlər də publik hüquqi şəxs elan olunmasını istisna etməyən ekspert Nadir İsrafilovun fikrincə, "Universitetin Təhsil Nazirliyinin tabeliyində publik hüquqi şəxs statusuna” müəyyən aydınlıq gətirilməlidir. Çünki məsələyə yanaşma hələ ki, bir mənalı deyil, və müəyyən aydınlaşdırmalar və dəqiqləşdirmələr tələb edir:
"Hər şeydən əvvəl xatırlatmaq yerinə düşər ki , Publik hüquqi şəxslər haqqında Azərbaycan Respublikasının Qanununa əsasən publik hüquqi şəxs – dövlət və bələdiyyə adından və ya publik hüquqi şəxs tərəfindən yaradılan, ümumdövlət və ictimai əhəmiyyət daşıyan fəaliyyətlə məşğul olan, dövlət və ya bələdiyyə orqanı olmayan təşkilatdır. Publik hüquqi şəxs dövlət adından müvafiq icra hakimiyyəti orqanı, bələdiyyə adından isə müvafiq bələdiyyə orqanları tərəfindən yaradılır. Bu Qanunun 4.1-ci maddəsinə uyğun olaraq yaradılan publik hüquqi şəxslər tərəfindən də nizamnaməsində nəzərdə tutulmuş halda publik hüquqi şəxslər yaradıla bilər.
Hesab edirəm ki, hər şey rəqabətə davamlılığdan, ona verilən kifayət qədər imtiyazlardan necə səmərəli istifadə edib edə bilməyəcəyindən, daha çox hansı xidmətlər göstərəcəyindən, hansı layihələrə imza ata biləcəyindən, xarici tələbələrin cəlbindən, əldə olunan qrantlardan və bir çox digər səbəblərdən asılı olacaq. İstisna etmirəm ki, təhsil haqqları ilə əlaqədar ödənişlər qaldırıla bilər ki, bu da müəyyən fəsadlarla müşayət oluna bilər. O da istisna olunmur ki, növbəti aylarda və ya illərdə bir sıra digər universitetlər də publik hüquqi şəxs elan olunsun.
Sadəcə olaraq "Universitetin Təhsil Nazirliyinin tabeliyində publik hüquqi şəxs statusuna” müəyyən aydınlıq gətirilməlidir. Baxmayaraq ki, məsələyə yanaşma hələ ki, bir mənalı deyil, və müəyyən aydınlaşdırmalar və dəqiqləşdirmələr tələb edir. Hər halda universitetlərin struktur, idarəetmə, göstərdiyi xidmətlər, təşkilati, maliyə, və digər Nizamnamə məqsədləri, tələbləri və şərtləri ilə tanış olduqdan sonra nəsə bir konkret və qəti fikir söyləmək olar”.
pia.az
