Təbiət və biologiya müəllimləri ilə görüş təşkil olunub
Təbiət və biologiya müəllimləri ilə görüş təşkil olunub.
AzTehsil.com xəbər verir ki, Abşeron-Xızı Regional Təhsil İdarəsinin tabeliyində fəaliyyət göstərən ümumtəhsil müəssisələrində təbiət və biologiya fənlərini tədris edən müəllimlərə metodiki dəstək göstərilməsi məqsədilə fənn kurikulumlarının və dərsliklərinin müəllifləri ilə görüş keçirilib.
Görüşdə Bakı Mühəndislik Universitetinin Qida və Biotexnologiya kafedrasının baş müəllimi, b.ü.f.d. Elşad Yunusov və Sumqayıt Dövlət Universitetinin Təbiət elmləri fakültəsinin dekanı, dosent, b.ü.f.d. Rəşad Səlimov iştirak ediblər.
Tədbir zamanı fənn kurikulumlarında edilmiş dəyişikliklər, təbiət fənninin tədrisi üçün effektiv metodologiyalar, beynəlxalq qiymətləndirmə tələblərinin və beynəlxalq yanaşmaların kurikulum və dərsliklərdə əks olunması barədə ətraflı məlumat verilib.
Həmçinin edilən yeniliklərin XXI əsr bacarıqları ilə əlaqəsi və onların şagirdlərin gələcək karyera inkişafına təsiri müzakirə olunub.
Görüş interaktiv şəkildə davam edib, müəllimlərin sualları cavablandırılıb, qarşılıqlı fikir mübadiləsi aparılıb.
Sonda müəllimlər çıxış edərək faydalı görüş üçün müəlliflərə təşəkkürlərini bildiriblər.
Qeyd edək ki, tədbir tədrisin keyfiyyətinin yüksəldilməsi məqsədilə təbiət və biologiya fənlərinin tədrisində effektivliyin artırılması istiqamətində həyata keçirilən planın tərkib hissəsidir.
