"Məktəbin idarəçilik səriştəliliyi zəifləyir"- ƏTRAFLI

"Elə bir mərhələdəyik ki, təhsildə idarəetmə sistemini yenidən düşünmək lazımdır" - Əməkdar müəllim.

"Azərbaycanda 600-ə yaxın məktəbdə direktor vəzifəsinin boş qalması ilə bağlı statistika təəssüf doğurur. Əgər yüzlərlə məktəb uzun müddət rəhbərsiz qalırsa, bu, artıq ayrı-ayrı kadr çatışmazlığı deyil, sistemli planlama və məsuliyyət problemi deməkdir. Direktor təyinatı bu qədər çətinləşibsə, deməli, idarəetmədə etimad mexanizmləri, namizəd hazırlığı və şəffaf seçim prosesləri istənilən səviyyədə işləmir. Məktəblər rəhbərsiz qalanda isə tədris keyfiyyəti, müəllim motivasiyası və məktəbin idarəçilik səriştəliliyi zəifləyir".

AzTehsil.com xəbər verir ki, bu barədə açıqlamasında Əməkdar müəllim, təhsil eksperti Sona Əliyeva Azərbaycanda 600-ə yaxın məktəbdə direktor vəzifəsinin boş qalması və xaricdə təhsil alıb Vətənə qayıdan gənclərimizin işsizlik problemi ilə bağlı danışarkən bildirdi.

"Digər tərəfdən, hər il yüzlərlə gənc xaricdə təhsil alıb Vətənə qayıdır, amma iş tapa bilmir. Bu da o deməkdir ki, biz beynəlxalq təhsil sisteminə çıxış yaradırıq, amma onun nəticəsini yerli strukturda dəyərləndirə bilmirik. Gənclər çox zaman diplomlarının tanınması, işə qəbul meyarlarının qeyri-şəffaflığı və təcrübə tələbləri ilə üzləşirlər. Yəni sistem onları xaricdə oxumağa təşviq edir, amma geri dönəndə qarşılarında qapalı mexanizm tapırlar. Əslində, bu iki problem bir-biri ilə sıx bağlıdır. Direktor yerlərinin boş qalması göstərir ki, idarəçilikdə yeni nəsil kadrların sistemə daxil olması üçün real mexanizm yoxdur. Xaricdə təhsil alan gənclər isə həmin sistemə daxil olmaq istəsələr də, onların potensialını qiymətləndirəcək struktur yoxdur.

Mənim fikrimcə, bu vəziyyət təkcə təhsil sahəsində yox, ümumilikdə dövlət kadr siyasətində yenilənmə və çevik planlama zərurətini göstərir. Təhsil sistemində "rəhbər" boşluğu yarananda, bu boşluq yalnız məktəblərdə deyil, gələcək nəsillərin inkişafında da hiss olunur. Biz indi elə bir mərhələdəyik ki, təhsildə idarəetmə sistemini yenidən düşünmək lazımdır. Kadr yetişdirmək kifayət deyil, o kadrı sistemdə saxlamaq, inkişaf etdirmək və ona etimad göstərmək lazımdır. Əks halda həm məktəblər rəhbərsiz qalacaq, həm də xaricdə təhsil alan gənclər bacarıqlarını başqa sahələrə və ya başqa ölkələrə yönəldəcəklər. Əgər biz təhsili inkişaf etdirmək istəyiriksə, sistemin əsas qayəsini - ədalətli seçim, şəffaflıq və insan potensialına etimadı bərpa etməliyik. Çünki təhsil idarəetməsi yalnız qayda və vəzifələrdən ibarət deyil, bu, ölkənin gələcəyini kimə etibar etdiyimiz məsələsidir", - deyə Əməkdar müəllim vurğulayıb.