Yeni dərs ili: Məktəbliləri hansı yeniliklər gözləyir?

Çərnəşnbə günü "Sputnik Azərbaycan" Multimedia Mətbuat Mərkəzində yeni tədris ilinin başlaması ilə bağlı tədbir keçirilib. Tədbirdə təhsilin inkişafı, bu sahədə mövcud problemlər barədə geniş müzakirələr aparılıb. Tədbirdə Təhsil Nazirliyinin aparat rəhbərinin müavini Fərzəli Qədirov, təhsil ekspertləri Nadir İsrafilov, Etibar Əliyev iştirak edib.

Təhsil Nazirliyinin Aparat rəhbərinin müavini Fərzəli Qədirov bildirib ki, 2017-ci ilin ötən müddəti ərzində Azərbaycanda 61 yeni məktəb inşa olunub: "Əlamətdar haldır ki, o məktəblərdən 60-ı məhz modul tiplidir. İlk dəfə olaraq ölkəmizin kənd yerlərində şagird kabineti az olan məktəblər üçün belə binalar quraşdırılıb. Hər cür şəraiti olan məktəblərdir. Eyni zamanda, orta məktəblər təmir olunub. Və 460-dan çox məktəb əsaslı təmir olunub".

F.Qədirovun dediyinə görə, bu il müəllimlərin diaqnostik qiymətləndirməsinə 49000 müəllim müraciət edib ki, bu da əvvəlki illərə nisbətən çox yüksək bir rəqəmdir. "Bu da onu göstərir ki, müəllimlər bu müsabiqənin şəffav və obyektiv keçirilməsinə inanaraq məhz müraicət edib. 4000 nəfər müəllim işləmək üçün vəsiqə qazanıb. Gənc müəllimləri həvəsləndirmək istiqamətində də işlər davam etdirilir. İşə qəbul olmuş 4000 müəllimlərdən əksəriyyəti gənc müəllimlərdir".

Nazirliyin rəsmisi əlavə edib ki, ali təhsil müəssisələrinə qəbul qaydaları ilkin olaraq təhlil edilib: "Bu il 37000-dən çox adam ali məktəblərə qəbul olunub. Əvvəlki illərə nisbətdə böyük bir rəqəmdir. Təhlillər göstərir ki, 2014-15-ci illərə nisbətən qəbul 11,6 faiz artıb. Eyni zamanda, keyfiyyət göstəriciləri son 4 ildə yüksəlib. Belə ki, 300 baldan çox toplayanlar 15,8 faiz, 400 baldan çox toplayanlar 8,8 faiz, 500 baldan çox toplayanlar 27,6 faiz, 600-dən çox bal toplayanlar 43,3 faiz artıb. Fərq hiss olunacaq qədər rəqəmlərdir. Nəticələr həm də onu göstərir ki, müəllimlik ixtisasını seçənlər arasında yüksəl bal toplayanların sayı artıb. 600-dən yuxarı bal toplayan tələbələrimiz ilk sırada məhz müəllimlik peşəsini seçiblər. Biz gözləyirik ki, onlar gələcəkdə yüksək peşəkar müəllim olaraq məktəblərimizdə pedoqoji fəaliyyətlə məşğul olacaqlar. Aparılan işlərin nəticəsidir ki, müəllim peşəsinə maraq artıb".

Təhsil eksperti Etibar Əliyevin sözlərinə görə, məktəb şəraitinin yaxşılaşdırılması təhsilin keyfiyyətinə müsbət təsir göstərir: "Bu ilin paradiqması təhsildə coğrafi faktorun aradan qaldırılması yaxşı olar. Məktəblərin sayının artırılması, modul tipli məktəblərin salınması coğrafi faktorun aradan qaldırılmasına kömək edir. Buna baxmayaraq, yenə də yaxşı məktəb, pis məktəb anlayışları var. Buna görə də valideynlər bir ərazidən digər əraziyə uşaqlarını daşıyırlar. Hər bir məktəbdə təhsilin keyfiyyəti nəzərə alınmalı, monitorinqlər həyata keçirilməlidir".

Təhsil eksperti Nadir İsrafilov deyib ki, müstəqillik əldə etdikdən sonra təhsil sahəsində görülən işləri qəbul etməmək ədalətsizlik olardı: "Dövlətin, cəmiyyətin, təhsil alanın təhsil sisteminə əsas tələbi təhsilin keyfiyyətidir. Təhsil strategiyasında da təhsilin keyfiyyəti ön plana çəkilib. Bu baxımdan Təhsil Nazirliyinin əmri ilə 2017-2018-ci təsris ilinin bilavasitə "Ümumi təhsildə keyfiyyət ili" elan olunması da təqdirəlayiqdir".

N.İsrafilov qeyd edib ki, təhsilin inkişafına yanaşma tərzini dəyişməliyik: "Bizdə təhsilin keyfiyyətinə pedaqoji yanaşma ilə təhsil qanunundakı yanaşmada böyük fərqlər var. Biz adətən təhsilin keyfiyyətinə neçə nəfərin fərqlənmə attestatı alması, neçə nəfərin keçid balını toplayaraq ali məktəbə qəbul olunması kimi baxmışıq. Təhsilin əsas vəzifəsi şəxsiyyət yönümlü vətəndaş hazırlamaqdır. Təhsilin şəxsiyyət yönümlüyünün nədən ibarət olduğunu ölçən kriteriyaları hazırlamaq lazımdır. Nəyə görə, biz daim filan məktəb filan qədər bal toplayıb deməli, amma filan mətəbin 5 şəhid verdiyini qabartmamalıyıq. Vətənə xidmət edən sədaqətli vətəndaş hazırlamalıyıq".