Əmisi oğlunun yerinə imtahan vermək istəyən şəxs TUTULUB
Əmisi oğlunun yerinə imtahan vermək istəyən şəxs TUTULUB.
Dövlət İmtahan Mərkəzinin (DİM) sədri Məleykə Abbaszadə imtahan zamanı başqasının yerinə daxil olmaq istəyən şəxslərlə bağlı diqqətçəkən açıqlama verib. DİM sədri dövlət televizyasına müsahibəsi zamanı belə hallar arasında hətta yaxın qohumların bir-birinin yerinə imtahana girməyə cəhd etdiklərini bildirib:
“Onlara deyirlər ki, siz çox oxşayırsınız, heç kim bunu ayırd edə bilməz. Üstəlik, ‘imtahanı da o daha yaxşı verə bilər’ düşüncəsi ilə bu yola əl atırlar”.
AzTehsil.com - n əldə etdiyi məlumata görə Məleykə Abbaszadə deyib ki, bəzi hallarda bir-birinə əkiz qədər bənzəyən şəxslər belə müəyyən olunaraq zaldan çıxarılır:
“Doğrudan da belə hadisələrlə qarşılaşırıq. Bir dəfə əmi uşağı tutulmuşdu. Mən deyərdim ki, onlar əkiz kimi oxşayırdılar. Amma yenə də tutulub imtahandan uzaqlaşdırılırlar”.
Qurum rəhbəri qeyd edib ki, DİM imtahan prosesinin şəffaf və ədalətli keçirilməsi üçün hər detalı nəzarətdə saxlayır:
“Materialların sızması ehtimalı daim diqqət mərkəzindədir. Amma ən önəmlisi odur ki, imtahana gedənlər bu cür qayda pozuntularına əl atmasınlar. Kiminləsə danışıb, qulağında cihaz aparmasınlar çünki bunların hamısı aşkar edilir və nəticələr onlar üçün acınacaqlı olur”.
M.Abbaszadə əlavə edib ki, bəzi cəhdlər ictimaiyyətə açıqlanmır, çünki bu halların psixoloji təsiri ola bilər. Buna baxmayaraq, DİM bu kimi pozuntuların qarşısını istisnasız alır.
