Azyaşlı məktəblilərdən gözəl addım

Azyaşlı məktəblilərdən Müstəqillik Günü ilə bağlı gözəl addım və nəcib çağırış...

Ad günlərində Qarabağ Dirçəliş Fonduna ianə etdiblər .

Abşeron rayon Mehdi Hüseynzadə adına Novxanı kənd 1 nömrəli tam orta məktəbin şagirdləri – 1-ci sinif şagirdi İnci Əliyeva və 5-ci sinif şagirdi Fateh Əliyev ad günləri və Müstəqillik Günü ilə bağlı maraqlı və bir o qədər də nəcib addım atıblar. Belə ki, şagirdlər ad günlərini 28 may – Müstəqillik Günü münasibətilə Qarabağ Dirçəliş Fonduna ağac ianə etməklə qeyd ediblər.

AzTehsil.com xəbər verir ki, bu barədə maderator.az-a danışan Fateh Əliyev mövzu ilə bağlı maraqlı fikirlər səsləndirib:

“Mən və bacım İnci Əliyevanın ad günümüzü bu şəkildə qeyd etməyimizə səbəb doğma Qarabağımızın bərpasına kiçik də olsa töhfə vermək, vətənimizin çiçəklənməsində az da olsa pay sahibi olmaqdır.

Hamıya məlumdur ki, ermənilər işğal dönəmində Qarabağda evləri, tarixi abidələri, məscidləri dağıtmaqla yanaşı, yaşıllıqları da məhv edib, meşələri kütləvi şəkildə qırıb. Bu gün dövlətimiz həmin meşələrin bərpası istiqamətində ciddi iş aparır, Qarabağda yüz minlərlə ağac əkilir. Buna görə də bacımla mən ad günümüzdə belə bir addım atmağa, Qarabağ Dirçəliş Fonduna ağac ianə etməyə qərar verdik.

Düşünürəm ki, əslində uşaqlı-böyüklü hər kəsin öz ad gününü bu şəkildə qeyd etməsi daha gözəl və faydalı olar. Biz öz ad günümüzdə Qarabağ Dirçəliş Fonduna ianə etməklə həm Qarabağımızın tərəqqisinə kömək edər, həm də öz sevincimizi dövlətimizə fayda verməklə daha da artırarıq. Buna görə də istərdik ki, insanlar öz ad günlərini, habelə əlamətdar hesab etdikləri digər günləri Qarabağ Dirçəliş Fonduna ianə etməklə yaddaqlan etsin.

Əminəm ki, yaşından asılı olmayaraq, hər bir insanın Qarabağımızın abadlaşmasına kömək etmək üçün edə biləcəyi nə isə var. Əgər hər kəs edə biləcəyi köməkliyi göstərərsə, bu, Qarabağın daha tez abadlaşmasına, vətənimizin daha da çiçəklənməsinə səbəb ola bilər. Bu isə xalq və dövlət olaraq hamımızın müqəddəs arzusu, başlıca amalıdır”.