BSU-da Təhsil İnstitutunun rəhbərliyi ilə görüş keçirilib

Bakı Slavyan Universitetində (BSU) Azərbaycan Respublikası Təhsil İnstitutunun rəhbərliyi ilə görüş keçirilib.

BSU-nun təşəbbüsü ilə baş tutan görüşdə xarici dillərin tədrisi üzrə kadr hazırlığı prosesi, bu istiqamətdə ali təhsil müəssisəsinin qarşısında duran mühüm məsələlər, təhsil prosesinin bütün maraqlı tərəflərinin cəlb edilməsi vasitəsi ilə yüksək keyfiyyətli təhsil proqramlarının tətbiqi məsələləri müzakirə olunub.

BSU-da təklif edilən təhsil proqramlarının əmək bazarının, o cümlədən müvafiq təhsil və kvalifikasiya standartlarının tələblərinə uyğunluğu, təhsil proqramlarının yenidən hazırlanması və təkmilləşdirilməsində, eləcə də məzunların peşəkar karyera inkişafının izlənilməsi və kadrların yenidən hazırlanması prosesində bu tələblərin nəzərə alınmasının vacibliyi vurğulanıb, bu istiqamətdə əməkdaşlıq imkanları müzakirə edilib. Görüş zamanı sosial elmlərin sahələri üzrə fəaliyyət göstərən ali təhsil müəssisələrində innovasiyaların dəstəklənməsi və transferi mərkəzlərinin yaradılmasının əhəmiyyəti qeyd olunub.

BSU-nun beynəlxalq əməkdaşlığının əhatəliliyinin genişləndirilməsi, professor-müəllim heyətinin akademik və elmi fəaliyyətinin beynəlmiləlləşdirilməsi və elmi nəticələrinin çəkisinin beynəlxalq elmmetrik bazalarda artırılması mühüm hədəflərdən biri kimi qeyd edilib. BSU-nun prioritet inkişaf istiqamətləri üzrə fəaliyyətinin təşkilinə dəstək verəcək layihə qrupunun yaradılması, təhsil proqramının hazırlanması üzrə təlimlər, brendləşmə məsələləri, eləcə də Təhsil İnstitutunun dəstəyi ilə xarici dil müəllimlərinin peşəkar bacarıqlarının artırılmasına yönəlik proqramlar müzakirə olunub.

Görüş zamanı BSU-dakı böyük elmi və pedaqoji potensialın imkanları, eləcə də ali təhsil müəssisəsinin özünəməxsus təcrübəsinin əhəmiyyəti qeyd edilib, mövcud potensialın slavyandilli ölkələrdə akademik diasporanın və diaspora məktəblərinin inkişafındakı mühüm perspektivləri vurğulanıb.

BSU-nun rektoru səlahiyyətlərini müvəqqəti icra edən Anar Nağıyevin, Təhsil İnstitutunun direktoru Rüfət Əzizovun, BSU və Təhsil İnstitutunun müvafiq struktur bölmə rəhbərlərinin iştirakı ilə keçirilmiş görüşdə əməkdaşlığın əsas fəaliyyət istiqamətləri üzrə tədbirlər planının əlaqləndirmə qrupu yaradılıb.