ADPU-nun baza məktəbi yeni tədris ilinə hazırlaşır

 

 

Azərbaycan Respublikasının Təhsil naziri cənab Mikayıl Cabbarov iyul ayının 20-də Azərbaycan Dövlət Pedaqoji Universitetinin (ADPU) baza məktəbi barədə əmr imzalayıb. Əmrdə ümumi təhsil sahəsində nəzəri ideyaların, pedaqoji yeniliklərin və innovativ layihələrin təcrübədə reallaşdırılması, tələbələrin pedaqoji bacarıqlarının formalaşdırılması üzrə eksperimentlərin aparılıb nəticələrin qiymətləndirilməsi və müvafiq inkişafyönlü təkliflərin hazırlanması istiqamətində pedaqoji ali məktəblərlə ümumi təhsil müəssisələrinin işgüzar əməkdaşlığının təmin olunmasına etibarlı zəmin yaratmaq məqsədilə Bakı şəhərindəki Məmməd Rahim adına 7 nömrəli tam orta məktəbin 2016-2017-ci tədris ilindən etibarən ADPU-nun baza məktəbi hesab edilməsi müəyyən olunub. Qeyd edək ki, bu əmrin verilməsi ölkəmizdə genişlənən təhsil islahatlarının, eləcə də yüksəkixtisaslı pedaqoji kadrların hazırlanması prosesinin tərkib hissəsidir və nəticə etibarilə təhsilin keyfiyyətinin yaxşılaşmasına xidmət edir. Əmrdə eyni zamanda ADPU-nun və Məmməd Rahim adına 7 nömrəli tam orta məktəbin rəhbərliyinin birlikdə həyata keçirilməsi nəzərdə tutulan pedaqoji eksperimentləri və qarşılıqlı əməkdaşlığın perspektiv istiqamətlərini əhatə edən Fəaliyyət planını hazırlayıb yerinə yetirilməsini təmin etmələri, əmrlə əlaqədar müəssisələrin nizamnamələrində müvafiq dəyişikliklər aparmaları, görülmüş işlər barədə hesabatlar hazırlayıb Nazirliyin rəhbərliyinə təqdim etmələri və digər məqamlar öz əksini tapıb. Onu da qeyd edək ki Təhsil nazirinin bu əmrindən irəli gələn vəzifələrin həlli ilə bağlı iyul ayının 27-də ADPU-da universitetin rektoru, professor Cəfər Cəfərovun rəhbərliyi ilə prorektorların, fakültə dekanlarının, dekan müavinlərinin, aparıcı kafedraların müdirlərinin, struktur bölmələrinin rəhbərlərinin, mütəxəssislərin, Məmməd Rahim adına 7 nömrəli tam orta məktəbin rəhbərliyinin, müəllimlərinin və Bakı Şəhəri üzrə Təhsil İdarəsinin nümayəndələrinin iştirakı ilə keçirilən tədbirdə maraqlı və səmərəli fikir mübadiləsi aparılıb, əməkdaşlığın yolları və perspektivləri müzakirə edilib. 

Bəs, ADPU-nun baza məktəbi yeni tədris ilinə necə hazırlaşır? Məktəbin direktoru Könül Həsənovanın verdiyi məlumata görə, ötən tədris ili bu təhsil müəssisəsinin kollektivi üçün uğurlu olub. Belə ki, bu il məktəbin 63 nəfər məzununun 57-si yüksək ballarla Azərbaycanın və xarici ölkələrin müxtəlif ali təhsil müəssisələrinə qəbul olunublar. Onlardan 3 nəfər 650-dən çox, 2 nəfər 600-dən çox, 12 nəfər isə 500-dən çox bal toplayıb. 600-dən çox bal toplayan 3 məzun BDU-nun Hüquq fakültəsinə, 2 nəfər isə ADA Universitetinə qəbul olunub. 

Hazırda məktəb yeni tədris ilinə hazırlaşır. Siniflərin komplektləşdirilməsi və dərsliklərin şagirdlərə çatdırılması təmin edilib. Təhsil müəssisəsində məktəbdaxili təlimlərin keçirilməsi, müəllimlərin informasiya-kommunikasiya texnologiyaları ilə işləmək bacarıqlarının artırılması və pedaqoji təcrübə mübadiləsi daim diqqət mərkəzində saxlanılır. Pedaqoji heyətin bilik və peşəkarlıq səviyyəsinin artırılması üçün müvafiq tədbirlər həyat keçirilir. 

Qeyd etmək yerinə düşər ki, məktəb Pedaqoji Şurasının yeni tədris ilinin başlanması ilə əlaqədar bu günlərdə keçirəcəyi iclasda adıçəkilən əmrin icrasından irəli gələn vəzifələr, Fəaliyyət planının hazırlanması, ADPU ilə ikitərəfli əməkdaşlıq, qarşılıqlı fəaliyyətin forma və istiqamətləri müzakirə ediləcək. Məktəbin rəhbərliyi və kollektivi bu istiqamətdə səmərəli fəaliyyət göstərmək əzmindədir.