Xankəndidə tikişçilik kursunu bitirən şəxslərə peşə sertifikatları verilib
Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyi tərəfindən Xankəndi şəhərində təşkil olunan tikişçilik üzrə peşə hazırlığı kursunu bitirən daha bir qrup şəxsə peşə sertifikatları təqdim edilib.
AzTehsil.com xəbər verir ki, agentliyin Qarabağ Peşə Hazırlığı Mərkəzində keçirilən tədbirdə işğaldan azad olunmuş ərazilərə köçürülən sakinlər üçün təşkil olunan peşə hazırlığı kursları onların məşğulluq imkanlarının genişləndirilməsində xüsusi önəm kəsb etdiyi qeyd olunub.
Xankəndi şəhərində təşkil olunan kurslara ümumilikdə işğaldan azad olunan ərazilərə köçürüləcək, hazırda ətraf ərazilərdə məskunlaşmış keçmiş məcburi köçkünlərdən 500-dən çox müdavim cəlb edilib.
Nəzəri və praktik hissələrdən ibarət olmaqla iki növbəli təşkil olunan kursları uğurla başa vuran şəxslərin Xankəndi şəhərindəki tikiş fabrikində işlə təminatı həyata keçirilir.
Agentlik qeyd olunan kateqoriyalara aid şəxslərdən daha bir qrupu üçün gələn ay tikişçilik sahəsi üzrə peşə hazırlığı kursu təşkil edəcək. Həmin kursu başa vuranların da işlə təminatına dəstək göstəriləcək.
