Bugün Yel çərşənbəsidir
Bugün Azərbaycanda Novruzun 3-cü - Yel çərşənbəsi qeyd olunur.
Yel çərşənbəsində əsən külək yazın gəlişindən xəbər verər.
AzTehsil.com xəbər verir ki, el arasında bu çərşənbəyə “Yelli çərşənbə”, “Küləkli çərşənbə” də deyilir. İnanclara görə, insan 4 ünsürdən su, od, yel və torpaqdan yarandığı üçün qədim insan bu ünsürləri dəyərli hesab edib. Belə düşünülürmüş ki, əgər çərşənbələr bayram kimi keçirilərsə, həmin il ruzi bərəkətli keçərmiş.
Odur ki, hər çərşənbədə olduğu kimi, bu zaman da evlərdə süfrə açılar, həyətlərdə tonqal qalanar.
Etiqadlara görə, bu çərşənbədə oyanan yel və külək dünyanı dolaşır, oyanmış suyu, odu hərəkətə gətirir, hər şeyə yeni nəfəs verir. Ona görə bu çərşənbəyə xalq arasında “yelli-küləkli” çərşənbə deyirlər.
Qeyd edək ki, martın 18-də isə İlaxır çərşənbə - Torpaq çərşənbəsi qeyd olunacaq.
Yaz fəslinin Azərbaycana daxil olması martın 20-si Bakı vaxtı ilə saat 13:01:25-ə təsadüf edəcək.
