Bu ixtisaslar üzrə keçid balı artacaq - AÇIQLAMA
"Bu il ixtisaslar üzrə keçid ballarının artması və ya azalması məsələsi hələ dəqiqləşməyib. Bu barədə məlumatı blok imtahanlarının nəticələrindən sonra əldə edəcəyik. Hazırda abituriyentər arasında apardığımız sorğuya əsasən, bu ilin imtahan nəticələri ötən illərinkindən daha uğurludur. Bu isə buraxılış imtahanı nəticələrinin yüksək olacağını göstərir".
Bu sözləri açıqlamasında təhsil üzrə ekspert Elçin Əfəndi bildirib.
AzTehsil.com xəbər verir ki, O qeyd edib ki, əsasən, 5-i ixtisas qrupu və 11 illik orta təhsil bazasından qəbul zamanı ixtisaslar üzrə formalaşan keçid ballarında artım müşahidə ediləcək.
"Bu proqnozu niyə söyləyirik? Çünki hər iki istiqamət üzrə qəbul yalnız buraxılış imtahanı nəticələrinə əsasən həyata keçirilir. Bu il ali təhsil müəssisələrinə müraciət edənlərin sayı kifayət qədər çoxdur. Hətta deyərdim ki, son illər ərzində qeydə alınmış ən yüksək göstəricidir. Bu isə ümumi ixtisas qrupları üzrə rəqabətin güclü olacağını göstərir. Həmçinin sorğularımıza əsasən, Azərbaycan dili fənnindən yüksək göstəricilər əldə edilib, bu da 3-cü qrupda keçid ballarının artacağını deməyə əsas verir.
Ümumilikdə, bal artımını xüsusilə ingilis dilində tədris olunan ixtisaslarda müşahidə edəcəyik.
Birinci qrupda əsasən, informasiya təhlükəsizliyi, kompüter elmləri və neft-qaz mühəndisliyi ixtisaslarında keçid ballarının artması gözlənilir. İkinci qrupda maliyyə, biznesin idarə olunması, üçüncü qrupda isə hüquqşünaslıq, dövlət və ictimai münasibətlər, tərcümə ixtisasları üzrə artım müşahidə oluna bilər. Eyni zamanda, dördüncü qrupda tibbi, stomatologiya, biotexnologiya və psixologiya ixtisaslarında da keçid ballarının artacağı ehtimalı var."
