Nazim Abbasovun doğum günüdür
AzTehsil.com xəbər verir ki, aprelin 1-i professor Maqsud Cavadovdan sonra Bakı Dövlət Universitetinin “Həndəsə” kafedrasına uzun illər rəhbərlik etmiş professor Nazim Abbasovun doğum günüdür. Mən Bakı Dövlət Universitetində müəllimlik fəaliyyətinə onun rəhbərlik etdiyi kafedrada başlamışam. Nazim müəllim çox qayğıkeş, diqqətli və təvəzökar insan idi.
Abbasov Nazim Tanrıverdi oğlu, həndəsə sahəsində mütəxəssis, 1930-cu il aprelin 1-də Ağstafa rayonunun Marksovka kəndində anadan olmuşdur. 1949-cu ildə Kirov adına 22 saylı Ağstafa dəmir yol orta məktəbini qızıl medalla bitirib, 1949-cu ildə Azərbaycan Dövlət Universitetinin fizika-riyaziyyat fakültəsinə daxil olub, 1954-cü ildə universiteti bitirərək riyaziyyatçı ixtisasına yiyələnib. 1955-ci ildə aspiranturaya qəbul olunmuşdur. 1959-cu ildə S.M.Kirov adına Azərbaycan Dövlət Universitetinin Elmi Şurasında professor B.A.Rozenfeldin elmi rəhbərliyi ilə “Kvazi qeyri-evklid fəzaların hərəkətləri qrupunun spin təsviri” mövzusunda namizədlik dissertasiyasını müdafiə edərək fizika-riyaziyyat elmləri namizədi elmi dərəcəsini almışdır. 1975-ci ildə Tiflisdə Regional Şuranın iclasında doktorluq dissertasiyası müdafiə etmişdir.
Əmək fəaliyyətinə 1957-ci ildə Azərbaycan Dövlət Universitetində başlayan Nazim Abbasov ömrünün sonuna qədər burada assistent, baş müəllim, dosent, kafedra müdiri işləmişdir. 1957-1959-cu illərdə “Həndəsə və cəbr” kafedrasında assistent, 1959-1964-cü illərdə baş müəllim, 1965-1978-ci illərdə dosent, 1972-2004-cü illərdə “Həndəsə” kafedrasının müdiri və eyni zamanda, 1978-2004-cü illərdə həmin kafedranın professoru vəzifəsində çalışmışdır.
1964-cü ildə “Həndəsə və cəbr” kafedrası üzrə dosent, 1978-ci ildə isə “Həndəsə” kafedrası üzrə professor elmi adlarına layiq görülmüşdür. Səhhəti ilə əlaqədar olaraq 2004-cü ildə “Həndəsə” kafedrasında professor-məsləhətçi vəzifəsinə keçirilir.
Abbasov Nazim 60-dan çox elmi tədqiqat xarakterli məqalənin müəllifidir. O, daim pedaqoji fəaliyyətlə məşğul olmuş, ümumi və həndəsə ixtisası üzrə mühazirə və seminarlar aparmışdır. 1980-ci ildə Azərbaycan Dövlət Universitetinin 60 illiyinə həsr olunmuş xatirə medalı və nişanı, 2000-ci ildə isə Azərbaycan Respublikası Təhsil Nazirliyinin fəxri fərmanı ilə təltif olunmuşdur.
Abbasov Nazim 2004-cü ildə Bakı şəhərində vəfat etmişdir. Allah rəhmət eləsin.
