“Mənfiləri yox et, uğur qazan” adlı layihəsinin bağlanış mərasimi keçirilib.

Azərbaycan Respublikası Elm və Təhsil Nazirliyinin Təhsildə inkişaf və innovasiyalar üzrə VIII qrant müsabiqəsi çərçivəsində qalib olmuş Xəlilova Şahanə Rafael qızının “Mənfiləri yox et, uğur qazan” adlı layihəsinin bağlanış mərasimi keçirilib.

Bağlanış mərasimində rəsmi qonaqlar, müəllimlər, şagirdlər və valideynlər iştirak ediblər. 

AzTəhsil.com xəbər verir ki, layihə rəhbəri Xəlilova Şahanə layihə hesabatını təqdim edib. O, görülmüş işlər, əldə olunmuş nəticələr və düşərgə haqqında ətraflı məlumat verib. O qeyd edib ki, Ümumilikdə 40 nəfər şagird üçün “Şagird nə istər?”, “Şagird qorxu və depressiyası”, “Davranış pozuntuları”, “Şagird psixologiyası”, “Komplekslər və gərginliklər” və “İmtahan zamanı stres və həyəcanın aradan qaldırılması yolları” mövzularında hər qrupa 6 təlim olmaqla, ümumilikdə 18 təlim keçirilib.

Daha sonra layihə müddətində həyata keçirilmiş fəaliyyətlərin yadda qalan anlarını əks etdirən qısa videoçarx izlənilib. Həmçinin, layihə iştirakçıları öyrəndiklərini və təəssüratlarını tədbir iştirakçıları ilə bölüşüblər. Məktəb direktoru Nuriyyə Ağayeva çıxış edərək layihənin mahiyyəti və uğurla başa çatması barədə danışıb. Təlim-tərbiyə işləri üzrə direktor müavini Quliyeva Səidə və dərs hissə müdiri Hümbətova Kəmalə də çıxış edərək layihənin uğurla icra olunmasından bəhs ediblər.

Sonda layihədə iştirak edən şagirdlər sertifikatlarla, layihəyə dəstək verən komanda isə təşəkkürnamələrlə təltif edilib.

Qeyd edək ki, layihənin məqsədi 4-cü, 9-cu və 11-ci sinif şagirdləri üçün effektli psixologiya proqramından istifadə edərək imtahan gərginliyini aradan qaldırmaq və onların imtahanlarda uğurlu nəticələr əldə etməsinə kömək etməkdir.