“Azərbaycanda universitet tələbəsi tozlu havadan zərbə alır” – Görmədiyimiz gizli problem

Ölkəmizdə ekoloji vəziyyətin yaxşılaşdırılması və sağlam ətraf mühitin yaradılması istiqamətində genişmiqyaslı, əhəmiyyətli tədbirlər həyata keçirilir. Paytaxt Bakı küləkli şəhərdir və burada olan azacıq toz kütləsini külək sürətlə ətrafa yayır.

Bəs, toz-duman kütləsinin çox olduğu şəhərlərdə təhsil alan şagirdlərin intellektual bacarıqlarına necə təsir göstərir? Çünki Avropa və Çin alimlərinin araşdırmalarına görə, atmosferi çirkli, tozlu olan yerlərdə insanların analitik düşüncə qabiliyyəti çox aşağı düşür. Bu da birbaşa təhsil sistemi ilə bağlıdır.

AzEdu.az-a açıqlaması zamanı professor, sosioloq alim Əhməd Qəşəmoğlu bildirib ki, ekoloji şərait insanlara çox təsir göstərir:

"Ekoloji şərait insanlara, məktəblilərə və onların təhsilinə müəyyən təsir göstərdiyi üçün bir çox ölkələrdə universitetlər şəhər kənarlarında yerləşir. Bizdə də ekoloji vəziyyət çirkli olduğuna görə bu, birbaşa insanlara təsir edir. Orta məktəbdə istərsə də universitetdə təhsil alan hər bir insan ekoloji mühitdən hər gün zərbə alır. Şagirdlərin, təhsil alan hər bir gəncin aldığı zərbə imkan vermir ki, onun intellektual imkanları, potensialı lazımi şəkildə sistemləşsin. Tozlu hava şəraiti şagirdlərin intellektual baxımdan təkmilləşməsinə zərbə vurduğu üçün onlarda bu problem artıq narahatedici səviyyəyə çatıb.

Coğrafiya elmlər doktoru dosent Zakir Eminov açıqlaması zamanı bildirib ki, havanın toz-duman olması birbaşa xəstəlikdir:

"Havanın toz-duman olması şagirdlərin fiziki inkişafına, yaddaşına, intellektual bacarıqlarına mənfi təsir göstərir. Şəhərdə mövcud olan yaşıllıqları ən azından qırmaq deyil, qorumaq lazımdır. Çünki ağaclar havanı təmizləyən birinci ekoloji vasitədir. Yaşayış olan ərazilərdə parkların, yaşıllıqların sayını artırmaq lazımdır”.