Şagirdlər yarışlarda zəif nəticə göstərirsə...
Son dövrlər hər kəs şikayət edir ki, məktəblilərin nitq qabiliyyəti, özünü ifadə etmək bacarıqları aşağı səviyyədədir. Əlbəttə ki, bunun ilkin səbəbi onların mütaliə etməməsidirsə, digər səbəbi onlara özünü ifadə etmək imkanlarının verilməməsidir.
Son illərdə Azərbaycan məktəblərində məktəbdən kənar fəaliyyət olduqca aşağı səviyyəyə düşüb:
"Orta məktəb şagirdləri daha çox ali məktəblərə qəbul imtahanlarında seçdikləri ixtisaslara aid olan fənləri oxuyurlar, ancaq bu fənlər üzrə biliklərə malik olurlar. Bu, heç də yaxşı hal deyil.
Bu kimi məsələlərin həlli istiqamətində kütləvi informasiya vasitələrinin üzərinə də böyük yük düşür. Lakin biz ölkədə fəaliyyət göstərən televiziya, radio, qəzet, jurnal, sayt və bu kimi mətbu orqanlara baxdıqda görürük ki, intellektual proqramların sayı yox dərəcəsindədir. Yalnız AzTV-də və İTV-də məktəb şagirdləri üçün intelektual verilişlər yayımlanır.
Halbuki əvvəllər digər kanallarda da bu kimi verilişlərin sayı kifayət qədər çox idi. Bu səbəbdən də bu gün kütləvi tədbirlərdə şagirdlər çıxış etmək istəmirlər, utanırlar. Amma onlara oxuduqları məktəbdə bu şərait yaradılsa, mütəmadi olaraq intellektual oyunlar məktəb rəhbərliyi tərəfindən həyata keçirilsə, şagirdlər özlərinə qarşı olan inamsızlığı dəf edərlər".
Ekspertlərin fikrincə, bu gün intellektual oyunlarda iştirak edən şagirdlərin nəticələri də qənaətbəxş deyil:
"Onların nümaiş etdirdikləri bilik və bacarıqları çox zəifdir. Bu onu göstərir ki, orta məktəblərdə sinifdən xaric oxu, dərsdən kənar fəaliyyət yaxşı səviyyədə təşkil olunmayıb”.
