İnklüziv təhsillə bağlı təlim-seminarlar bir neçə istiqamətdə aparılıb
Özbəkistandan olan heyət üçün inklüziv təhsillə bağlı təlim-seminarlar bir neçə istiqamətdə aparılıb.
AzTehsil.com xəbər verir ki, Azərbaycan Dövlət Pedaqoji Universitetin Quba filialında Özbəkistandan olan pedaqoji heyət üçün “İnklüziv təhsil və STEAM Texnologiyaları: Beynəlxalq Təcrübə və Qabaqcıl Təhsil Modelləri” mövzusunda təşkil olunan təlim-seminarlar bir neçə istiqamətdə aparılıb.
ADPU-nun Quba filialının dekanı səlahiyyətlərini müvəqqəti icra edən, təcrübəli pedaqoq Nubar Bayramova tərəfindən inklüziv təhsillə bağlı keçirilən təlim-seminarlar filialın akt zalında təşkil olunub.
Təlimlərdə inklüziv təhsilin vacibliyi, əlilliyi olan uşaqların ümumtəhsil məktəblərindən kənarlaşdırılmamasının əhəmiyyəti, hər bir uşaq üçün yaşadıqları icmada digərləri ilə bərabər əsaslarla inklüziv, keyfiyyətli və pulsuz ibtidai və orta təhsil almaq imkanlarının vacibliyi, dərs prosesində şagirdlər üçün fərdi ehtiyacları nəzərə alaraq uyğunlaşdırmalar aparmağın zəruriliyi məsələləri özbəkistanlı müdavimlərin diqqətinə çatdırılmış, inklüzivliyin tam şəkildə təmin olunması üçün akademik və sosial inkişafa şərait yaradan mühitdə fərdi ehtiyaclara uyğunlaşdırılmış zəruri dəstək tədbirləri izah edilmişdir. Həmçinin Azərbaycan təhsilində inklüziv sahədə olan layihələr, tətbiq olunan model və pilot məktəblər nümunə göstərilmiş, praktik nəticələr ilə tanış olmuşlar. Təlimin sonunda iştirakçılar sessiyalarda öyrəndiklərini bir araya toplayaraq dərs planları hazırlamaq üçün praktik olaraq birgə çalışmışlar.
Keçirilən hər təlimin sonunda müdavimləri maraqlandıran suallar cavablandırılımış, mövzulara dair ədəbiyyatlar tövsiyə edilmiş, bu istiqamətdə Pedaqoji Universitetin Quba filialının təcrübəsi və imkanları izah olunmuşdur.
İştirakçılara təlim sertifikatları təqdim olunmuşdur.
