“Şəxsi məlumatların yayılması sosial ədalətə və uşaq hüquqlarına ziddir”
"Şəxsi məlumatların ictimai şəkildə işlənməsi, hətta üçüncü şəxslər tərəfindən paylaşılması belə qanunsuz hal sayılır. Bəzən uşaqların şəxsi məlumatlarının hətta valideynləri ilə belə paylaşılmaması zəruri ola bilər, nəinki sosial şəbəkələrdə yayılması".
AzTehsil.com xəbər verir ki, bu sözləri açıqlamasınsa psixoloq Fidan Canbabazadə deyib.
"Düşünürəm ki, bu cür xəbərlərin yayılmasına şərait yaradan qurumlar, bu prosesdə iştirak edən şəxslər mütləq məsuliyyətə cəlb edilməlidir. Əgər bu işi müəllim və ya məktəb heyəti həyata keçiribsə, onlar intizam məsuliyyəti daşımalı, lazım gələrsə, töhmət almalı, hətta müəyyən hallarda işdən azad olunmalıdırlar".
O bildirib ki, əsas diqqət uşağın psixoloji vəziyyətinə yönəlməlidir:
"Belə hallarda uşaqlar psixoloqa yönləndirilməli, məktəb yaşından etibarən onlarla fərdi və qrup şəklində maarifləndirici söhbətlər aparılmalıdır. Şagirdlər anlamalıdırlar ki, başqalarının şəxsi məlumatlarını yaymaq olmaz.
Əgər bu cür hərəkəti müəllim, məktəb rəhbərliyi və ya digər böyüklər edirsə, onlara qarşı mütləq tədbir görülməlidir".
Psixoloq deyib ki, bəzi hallarda bu davranışların arxasında psixoloji səbəblər də dayanır:
"Məsələn, bəzən insanlar emosional təsir altında və ya diqqət çəkmək məqsədilə belə addımlar ata bilirlər. Amma istənilən halda şəxsi məlumatların yayılması, xüsusilə uşaqlara aid məlumatların paylaşılması çox ciddi nəticələrə səbəb ola bilər.
Belə məlumatlar yayıldıqda uşaq psixoloji travma ala, özünə zərər vermə davranışları göstərə bilər. Buna görə də hökumət və təhsil müəssisələri bu sahədə ciddi tədbirlər görməli, uşaqların hüquqlarının qorunması istiqamətində nəzarəti gücləndirməlidirlər. Çünki şəxsi məlumatların yayılması bəzən birbaşa “buling” və ya “mobbing” forması alır və uşağın sosial mühitdə təcrid olunmasına gətirib çıxara bilir".
Qeyd edək ki, Mingəçevir şəhər Rüstəm Qəhrəmanov adına 14 nömrəli məktəbin sosial şəbəkə hesabında şagirdlərlə bağlı məlumatların toplandığı sənədin paylaşılması narazılıq yaradıb.
