Türk Dövlətlərinin Üz-Çənə Cərrahları üzrə I Konqresi keçirilib
Bakıda Türk Dövlətlərinin Üz-Çənə Cərrahları üzrə I Konqresi keçirilib.
Konqresin özəlliyi Beynəlxalq Üz-Çənə Cərrahları Kollecinin 33-cü Dünya Konqresi (ICMFS) və Azərbaycan Ağız və Üz-Çənə Cərrahları Cəmiyyətinin III Beynəlxalq Konqresi ilə paralel şəkildə təşkil olunmasıdır. Bu tədbir Türk dünyasının ən nüfuzlu mütəxəssislərini bir araya gətirərək bilik mübadiləsinə, innovasiyalara və gələcək əməkdaşlıqlara zəmin yaradıb.
AzTehsil.com xəbər verir ki, dünyanın müxtəlif ölkələrindən yüzlərlə mütəxəssisin iştirak etdiyi konqres Səhiyyə Nazirliyi, Azərbaycan Tibb Universiteti, İ.M.Seçenov adına Birinci Moskva Dövlət Tibb Universitetinin Bakı filialı və TƏBİB-in birgə dəstəyi ilə baş tutub.
Konqresin açılış mərasimində Azərbaycan Ağız və Üz-Çənə Cərrahları Cəmiyyətinin sədri professor Çingiz Rəhimov bildirib ki, tədbir tibb elminin inkişafı, müasir müalicə üsullarının paylaşılması və beynəlxalq əməkdaşlıq üçün mühüm platformadır. Qeyd olunub ki, ABŞ, İtaliya, Almaniya, Türkiyə, İsrail, Braziliya, Belçika və digər ölkələrdən tanınmış məruzəçilərin qatıldığı tədbirin elmi proqramı ağız və üz-çənə cərrahiyyəsi ixtisası ilə yanaşı, qonşu peşə sahələrini də əhatə edir. Bunlara stomatologiya, üzün estetik və rekonstruktiv cərrahiyyəsi, baş-boyun onkologiyası, otorinolarinqologiya, dermatologiya və kosmetologiya aiddir.
Çingiz Rəhimov tədbirin məqsədinin bu sahədə tibbi xidmətin daha yüksək səviyyəyə qaldırılması üçün ən yeni texnologiyaların tətbiqinin müzakirəsi və təcrübə mübadiləsinin aparılması olduğunu vurğulayıb. O, konqresin “Yeni elmi və praktiki üfüqlə addımlayırıq!” devizi ilə keçirildiyini diqqətə çatdırıb.
Açılış mərasimində, həmçinin Milli Onkologiya Mərkəzinin baş direktorunun birinci müavini professor Əziz Əliyev və digərləri çıxış edərək tədbirin elmi əhəmiyyətini vurğulayıb, konqresin işinə uğurlar arzulayıblar.
Üçgünlük tədbbir çərçivəsində baş və boyun cərrahiyyəsində dünya miqyasında tanınmış mütəxəssis, professor Jatin Şah (ABŞ), üz transplantasiyası üzrə 7 əməliyyat təcrübəsinə malik, dünyaşöhrətli üz-çənə cərrahı, professor Jan-Pol Meningaud (Fransa), Hayfa Universitetinin Ağız və üz-çənə cərrahiyyəsi şöbəsinin müdiri professor Adi Rachmiel (İsrail), Loğman Həkim Universitetinin Ağız və üz-çənə cərrahiyyəsi şöbəsinin müdiri, Çənə-Dodaq Yarığı və Əlaqəli Anomaliyalar Mərkəzinin direktoru professor Reha Kisnisci (Türkiyə) və digərləri məruzələrlə çıxış ediblər.
Beynəlxalq mütəxəssislər təcrübə mübadiləsinin üz-çənə cərrahiyyəsinin bütün istiqamətlərinin inkişafına töhfə verəcəyini söyləyiblər.
Tədbir çərçivəsində plenar iclaslar, simpoziumlar, təqdimatlar və ixtisaslaşmış sərgilərlə zəngin proqram təqdim olunub. Həmçinin Azərbaycanda ilk dəfə beynəlxalq mütəxəssislərin iştirakı ilə üz cərrahiyyəsinə və almacıq diş implantasiyasına və pasiyentlər üzərində estetik təbabətə aid master-klas keçirilib.
