Məktəbli qızlar arasında şahmat üzrə rapid turnir keçirilib
Məktəbli qızlar arasında şahmat üzrə rapid turnir keçirilib.
AzTehsil.com xəbər verir ki, 11 oktyabr 2025-ci il tarixində Tərtər rayonunda Qarabağ Regional Təhsil İdarəsinin tabeliyindəki ümumi təhsil müəssisələrinin qız şahmatçıları arasında 11 Oktyabr – “Beynəlxalq Qızlar Günü” münasibətilə şahmat üzrə rapid turnir keçirilib.
Tədbir Tərtər Rayon Uşaq-Gənclər İdman-Şahmat Məktəbinin inzibati binasında təşkil olunub. Açılış mərasimində Ümummilli Lider Heydər Əliyevin və Vətənimizin suverenliyi, ərazi bütövlüyü uğrunda canlarından keçən şəhidlərimizin xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.
Turnirin rəsmi açılışında Tərtər Rayon İcra Hakimiyyətinin, Azərbaycan Şahmat Federasiyasının, Qarabağ Regional Təhsil İdarəsinin, Qarabağ Regional Gənclər və İdman İdarəsinin, eləcə də Yeni Azərbaycan Partiyası Tərtər rayon təşkilatının nümayəndələri iştirak ediblər.
Çıxışlarda ölkəmizdə idmanın inkişafına, xüsusilə də gənclər və məktəblilər arasında şahmat idman növünə göstərilən dövlət qayğısı vurğulanıb. Qadınlar arasında Beynəlxalq qrossmeyster Zeynəb Məmmədyarova da tədbirdə çıxış edərək öz şahmat karyerasından danışıb və iştirakçılara uğurlar arzulayıb.
Turnirdə 6 rayon üzrə 70 nəfər məktəbli qız şahmatçı mübarizə aparıb. Yarışda Bərdə 1-ci yer, Tərtər 2-ci yer, 3-cü yeri isə Ağcabədi rayonunun təmsil edən komanda qazanmışdır.
Yarışın sonunda qaliblər Azərbaycan Şahmat Federasiyası tərəfindən diplom və medallarla təltif olunublar.
