İmişlidə baxımsız vəziyyətdə olan məktəblə bağlı məsələyə aydınlıq gətirilib
İmişli rayonu Qulubəyli kənd tam orta məktəbi baxımsız vəziyyətdədir. Məktəbin bütün sinif otaqları təmirsiz, pəncərələr isə qırıqdır.
AzTehsil.com- n əldə etdiyi məlumata görə, bu barədə valideynlər müraciət edib. Onlar illərdir davam edən bu vəziyyətdən şikayətçi və narahatdırlar.
Məktəbin direktor əvəzi Rafiq Bədirov Teleqraf-a açıqlamasında bildirib ki, məktəb binası 1990-cı ildə təmirdən çıxıb:
“Bu, Qulubəyli kəndində fəaliyyət göstərən yeganə məktəbdir. Hazırda burada 186 şagird təhsil alır”.
O əlavə edib ki, yeni məktəb binasının tikilməsi ilə bağlı aidiyyəti qurumlara müraciət olunub.Mil-Muğan Regional Təhsil İdarəsi Teleqraf-ın sorğusuna cavab olaraq bildirib ki, idarənin tabeliyində fəaliyyət göstərən ümumi təhsil müəssisələrinin maddi-texniki bazasının gücləndirilməsi, müasir avadanlıqlarla təmin olunması, yeni məktəb binalarının inşası və mövcud binaların əsaslı təmiri əsas prioritetlərdəndir.
“Son bir il ərzində Mil-Muğan Regional Təhsil İdarəsinin tabeliyində olan 39 məktəbdə cari təmir işləri aparılıb, 2 məktəb isə sökülərək yenidən tikilib. Yenidən tikilən Saatlı rayonu İkram Ağayev adına Nabatkənd kənd tam orta ümumtəhsil müəssisəsi artıq istifadəyə verilib.
Bildiririk ki, İmişli rayonu İmanverdi Əliyev adına Qulubəyli kənd tam orta ümumtəhsil məktəbinin mövcud vəziyyətindən xəbərdarıq. Təhsil müəssisəsinin əsaslı təmir olunması ilə bağlı məsələ qeydiyyata alınıb.
Qeyd edirik ki, təhsil müəssisələrinin təmiri və tikintisi növbəlilik və prioritetlik prinsipləri əsasında həyata keçirilir”.
