Qubada 600-dən çox bal toplayan məzunlarla görüş keçirilib
Quba rayonunda 600-dən çox bal toplayan məzunlarla görüş keçirilib.
AzTehsil.com xəbər verir ki, 2025-ci il 9 sentyabr tarixində Quba-Xaçmaz Regional Təhsil İdarəsinin tabeliyində fəaliyyət göstərən Quba rayonu üzrə ümumi təhsil müəssisələrinin 600-dən çox bal toplayan məzunları ilə görüş keçirilib.
Tədbirdə Quba Rayon İcra Hakimiyyətinin başçısı İlqar Mahmudov, Quba-Xaçmaz Regional Təhsil İdarəsinin müdiri Coşqun Əliyev, təhsil sektorunun əməkdaşları, məktəb direktorları və yüksək nəticə göstərmiş məzunlar iştirak ediblər.
Çıxış edən Quba Rayon İcra Hakimiyyətinin başçısı İlqar Mahmudov və Quba-Xaçmaz Regional Təhsil İdarəsinin müdiri Coşqun Əliyev məzunları, onların müəllimlərini və valideynlərini təbrik ediblər. Onlar ölkədə təhsilə göstərilən dövlət qayğısından və regionda həyata keçirilən islahatlardan bəhs edərək, ümummilli lider Heydər Əliyevin təhsilə verdiyi xüsusi önəmi vurğulayıblar. Qeyd olunub ki, bu strategiya bu gün Prezident İlham Əliyev tərəfindən uğurla davam etdirilir və daha da inkişaf etdirilir.
Görüşdə tələbə adını qazanan məzunlar da çıxış edərək göstərilən diqqət və qayğıya görə minnətdarlıqlarını bildiriblər.
Sonda qəbul imtahanlarında yüksək nəticə göstərmiş məzunlara Quba Rayon İcra Hakimiyyətinin başçısı tərəfindən Fəxri Fərmanlar və hədiyyələr təqdim olunub.
