“Hamı məktəblərə eyni forma geyinsin”- DEPUTAT
Əksər məktəblərin fərqli məktəb formaları var. Valideynlər də şikayətlənirlər ki, övladları məktəb dəyişəndə gərək forma da dəyişsin. Təklif də irəli sürülür ki, bütün məktəblər vahid məktəb formasında istifadə etsin.
AzTehsil.com- n əldə etdiyi məlumata görə mövzu ilə bağlı danışan Milli Məclisin Elm və təhsil komitəsinin üzvü Ceyhun Məmmədov bildirdi ki, bu narazılıqda müəyyən həqiqət payı da var.
"Əvvəlki dövrlərdə bütün məktəblərdə, yəni dövlət məktəblərində vahid məktəbli forması tətbiq olunurdu ki, bu da bizə çox geniş və rahat imkan yaradırdı. Valideynlər bir məktəbdən başqa məktəbə övladlarını keçirəndə yeni geyim almağa məcbur olmurdular. İndi isə sistem, qayda dəyişib və sistemin dəyişməsi müəyyən problemlər, narahatlıqlar yaradır. Valideyn övladının məktəbini dəyişdiyi halda məcbur olur ki, yenidən paltar alsın və övladının paltarını dəyişsin. Bu mənada, belə bir məsələnin reallığının nəzərə alınması yaxşı olardı ki, valideynlər üçün çətinlik yaranmasın və onlar bu məsələdə əziyyət çəkməsinlər. Bir daha qeyd edirəm ki, indi özəl məktəblərdə situasiya bir az fərqlidir. Hətta o məsələyə də baxmaq olar, amma ümumilikdə dövlət məktəbləri ilə bağlı belə bir məqamın nəzərə alınması önəmlidir, vacibdir və nəzərə alınmalıdır", - deyə millət vəkili vurğulayıb.
