Magistratura: "Dövlət sifarişli yerlər də tam dolmur"
"2024-2025-ci tədris ili üçün təxminən 3000-dən artıq magistratura üzrə boş yer qalmışdı. Onlardan təxminən 1200-ü dövlət sifarişli idi. Halbuki dövlət sifarişli yerlər adətən heç vaxt boş qalmırdı. Amma artıq magistraturaya qarşı olan laqeyd münasibət belə bir vəziyyət yaradıb ki, dövlət sifarişli yerlər də tam dolmur".
AzTehsil.com xəbər verir ki, bu fikirləri təhsil eksperti Məzahir Məmmədli magistratura təhsilinə marağın azalmasından danışarkən bildirdi.
Onun sözlərinə görə, əmək bazarında magistraturaya tələb yoxdur:
"Məsələn, işəgötürənlərin heç biri magistratura diplomunu şərt kimi irəli sürmür. Çünki bəzi ixtisaslar var ki, texniki fənlər, kompüter elmləri, dizayn sahələri, bu istiqamətlər üzrə işəgötürənlər magistratura pilləsini bitirməyi zəruri hesab etmirlər. Ona görə də bu sahələrdə göstəricilər həmişə aşağı olub.
Digər bir faktor isə odur ki, indiyədək Azərbaycan müharibə şəraitində idi və oğlanların əksəriyyəti magistratura və doktorantura pilləsinə maraq göstərirdilər ki, hərbi xidmətdən möhlət hüququ qazansınlar. İndi isə bu, onlar üçün cəlbedici deyil və bu faktor da öz rolunu oynayır".
M.Məmmədli vurğuladı ki, Azərbaycanda elm dalınca getmək istəyənlərin sayı çox azdır:
"Bildiyiniz kimi, doktoranturadan əvvəlki mərhələ magistratura səviyyəsidir. Amma elm sahəsinə maraq olmadığından bu pilləyə qoşulanlar da azdır. Çünki motivasiya yoxdur. Onların diqqətini cəlb edəcək güzəştlər tətbiq olunmalıdır, lakin belə imkanlar yoxdur. Magistratura və bakalavr pillələrini bitirənlər əmək bazarında eyni maaş alırlar. İşəgötürənlər bu fərqi qiymətləndirmirlər. Buna görə də münasibət müəyyən mənada dəyişib. Digər tərəfdən, Azərbaycanda 51 universitet fəaliyyət göstərir. Ancaq bu universitetlərin hamısı elə standartlara cavab vermir ki, orada yüksək səviyyədə magistrlar yetişdirilsin. Elə özəl universitetlər var ki, onların qəbul planına baxanda adam təəccüblənir: bu qədər magistratura yeri haradandır axı? Halbuki bunun üçün müvafiq tədris, elmi-texniki, maddi-texniki baza olmalıdır. Təəssüf ki, belə neqativ hallar da magistraturanın prestijini aşağı salır. Yəni ümumilikdə, vəziyyətə fərqli yanaşmalar mövcuddur".
