Dövlət bağçalarında kameralar quraşdırılsın- MÜZAKİRƏLƏR
Valideynlər dövlət məktəbəqədər təhsil müəssisələrində (bağçalarda) videomüşahidə kameralarının olmamasından narazılıq edirlər. Valideynlərin sözlərinə görə, xüsusilə maddi imkanları məhdud olan ailələr övladlarını məhz dövlət bağçalarına yerləşdirir, lakin kameraların quraşdırılmaması uşaqlara gündəlik nəzarətin həyata keçirilməsini çətinləşdirir və etimad probleminə səbəb olur.
AzTehsil.com məsələ ilə bağlı Məktəbəqədər və Ümumi Təhsil üzrə Dövlət Agentliyinə sorğu göndərib.
Agentliyin cavabında bildirilib ki, məktəbəqədər təhsil müəssisələrində uşaqların təlim-tərbiyə prosesi və qidalanması ilə yanaşı, onların təhlükəsizliyi də vacib şərtlərdəndir. Bu məsələ müəssisə rəhbərliyi və tərbiyəçi-müəllimlər tərəfindən daim nəzarətdə saxlanılır.
Agentlik həmçinin qeyd edib ki, təhsil müəssisələrində kameraların quraşdırılması məsələsi nəzərdə tutulmayıb:
""Məktəbəqədər təhsil haqqında" Azərbaycan Respublikasının qanunu, eyni zamanda Nazirlər Kabinetinin “Təhsil müəssisələrinin tikintisinə, maddi-texniki təchizatına dair vahid normalar, ümumi sanitariya-gigiyena tələbləri, şagird yerləri ilə təminat normativləri” haqqında qərarına əsasən dövlət məktəbəqədər təhsil müəssisələrində kameraların quraşdırılması nəzərdə tutulmayıb. Lakin müasir dövrün tələbləri, eləcə də təlim-tərbiyə prosesinə nəzarətin daha da artırılması məqsədilə hazırda məktəbəqədər təhsil müəssisələrinin kameralarla təchiz edilməsi imkanları araşdırılır. Bununla bağlı Elm və Təhsil Nazirliyi və digər aidiyyəti qurumlarla müzakirələr aparılır”.
