Tədris ili başlayır - şəhərdə gediş-gəliş...- ƏTRAFLI
Yeni tədris ilinin başlanmasına çox az müddət qalıb və bu, şəhərdə tıxacların artmasını qaçınılmaz edir. Metrolarda sıxlıq, avtobuslarda və avtomobil yollarında gediş-gəlişin çətinləşməsi artıq gözlənilən haldır.
Valideynlər uşaqlarını məktəbə aparır, tələbələr isə universitetlərə axın edirlər, nəticədə şəhərdə tıxaclar pik həddə çatır. Bu vəziyyət insanların gərginlik və stress yaşamasına, həmçinin vaxtında işə və dərslərə çatmalarına mane olur. Bəzi şəxslər məktəblərdə və universitetlərdə dərslərin eyni saatda başlamasını tıxacların əsas səbəbi kimi göstərirlər.
Bu problemi həll etmək üçün hansı addımlar atıla bilər? AzTehsil.com xəbər verir ki, mövzu ilə bağlı azedu.az-a açıqlama verən təhsil eksperti Ramin Nurəliyev Bakıda tıxacların formalaşmasında məktəblərin və universitetlərin rolundan danışıb:
İki növbəli məktəblərdə dərslərin saatlarını dəyişmək çətindir, lakin yaxın ərazidəki məktəblərdə dərslərin yarım saat fərqlə başlaması tıxacları müəyyən qədər azalda bilər:
"Universitetlər də tıxaclara təsir edir, çünki regionlardan tələbələrin Bakıya axını yolları sıxlaşdırır.Tıxacların yalnız məktəb və universitetlərlə əlaqəsi yoxdur. Bəzi valideynlər uşaqlarını maşınla aparır və ictimai nəqliyyatdan istifadə azdır.
Cəmiyyəti avtobus və digər ümumi nəqliyyat vasitələrinə öyrəşdirmək, avtobus zolaqlarının artırılması, şəhərdə inzibati binaların çoxaldılması və keyfiyyətli yataqxana sisteminin genişləndirilməsi tıxacların azalmasına kömək edə bilər. Dərs saatlarının və iş qrafiklərinin optimallaşdırılması da insanların gediş-gəlişini asanlaşdıracaq və şəhərdə nəqliyyatın yükünü yüngülləşdirəcək.
