Məktəbəqədər təhsilə cəlb olunan uşaqların sayı ARTIB
AzTehsil.com xəbər verir ki, məktəbəqədər təhsil müəssisələrində təlim-tərbiyə prosesinə və ümumi təhsil müəssisələrində məktəbəhazırlığa cəlb olunmuş uşaqların ölkədəki 1–5 yaşlı uşaqların ümumi sayındakı xüsusi çəkisi bu ilin əvvəlinə 37,1 faiz təşkil edib. Halbuki ötən il bu göstərici 34,6 faiz idi.
Bu rəqəmlər Dövlət Statistika Komitəsinin dərc etdiyi “Azərbaycanda uşaqlar” statistik məcmuəsində yer alıb.
2025-ci ilin əvvəlinə ölkədə fəaliyyət göstərən məktəbəqədər təhsil müəssisələrinin ümumi sayı 1872-yə çatıb. Onların 1708-i dövlət, 164-ü isə özəl müəssisədir. Müqayisə üçün, ötən ilin əvvəlinə bu rəqəm 1700-ü dövlət, 157-si isə özəl müəssisə olmaqla 1857 idi.
Hesabat dövründə məktəbəqədər təhsil müəssisələrinə 115 min uşaq cəlb edilib. Onların 107,7 mini dövlət, 7,3 mini isə özəl müəssisələrdə təhsil alır. Ümumilikdə hər 100 yerə düşən uşaq sayı 76 nəfər təşkil edib.
Qeyd edək ki, icma əsaslı məktəbəqədər təhsil qruplarının ümumi sayı 1177-yə çatıb. Bu qruplara cəlb olunan uşaqların sayı isə 19,4 min nəfər olub.
