Ekspertdən Nazirlər Kabinetinə TƏKLİF
Bu il magistraturaya qəbul üçün ümumilikdə 16 min 794 plan yeri ayrılıb. Lakin nəticələr göstərir ki, onlardan 3300-dən çoxu boş qalıb.
AzTehsil.com xəbər verir ki, edaktor.az-a danışan təhsil eksperti Məzahir Məmmədli bildirdi ki, 2019-2020-ci tədris ilində cəmi 6100 nəfərə qədər magistratura qəbulu var idisə, artıq 2025-2026-cı tədris ili üçün bu say artıq 16 minə çatıb.
"Baxaq görək ki, bu il, son beş ildə 10 min nəfər artırılan magistrlər üçün universitetlərdə o biliyi, bacarığı mənimsəmək üçün imkan şərait var, yoxsa yoxdur. Düşünmürəm ki, son 5 ildə bizim universitetlərimizin maddi-texniki bazası o qədər yüksəlib ki, bizdə bu qədər artıq magistr təhsil almasına ehtiyac yaranıb. Baxaq görək həmin magistrlər üçün o imkanlar, o maddi-texniki baza, onları əmək bazarına hazırlayan, elm potensialını üzə çıxaran tədris mühiti varmı? Hələ biz əvvəlcə onu bir baxıb müzakirə eləməliyik. Sonra boş qalan yerlərlə bağlı da bir əlavə müzakirə açmağa yer var. Siz təsəvvür eləyin ki, Dövlət İmtahan Mərkəzi plan yerlərinə uyğun imtahan keçirir. 15555 nəfər seçimə buraxılıb.Onlardan təxminən,13 mindən nə qədəri növbəti mərhələ üçün bal toplaya bilib. Ümumilikdə mən düşünürəm ki, burada bir qədər uyğunsuzluq var".
Onun fikrincə, Nazirlər Kabineti ali təhsil müəssisələrinin imkanlarına uyğun magistratura qəbulunu müəyyən etməlidir.
"Axı biz düşünməliyik ki, magistrlərin bu qədər buraxılışı, sabah əmək bazarında özünü işlə təmin eləmək məsələsi necə olacaq? Əvvəlcə bu barədə bir təftiş getməlidir ki, sonrakı mərhələlər üçün o məsələlərlə bağlı bir müzakirə açılsın", - deyə Məzahir Məmmədli fikrini yekunlaşdırıb.
