Nöqsanlı direktorlar niyə vəzifəyə qaytarılır?

Elm və təhsil naziri Emin Əmrullayev "Sertifikatlaşdırma 2025: peşəkar müəllim – keyfiyyətli təhsil” mövzusunda keçirilən tədbirdə bildirib ki, məktəb direktorlarının 20 faizi məhkəmə qərarı ilə işinə bərpa olunub.

AzTehsil.com xəbər verir ki, məsələ ilə bağlı təhsil sahəsi üzrə tədqiqatçı Elmin Nuri Modern.az-a açıqlamasında bildirib ki, işdən çıxarılan məktəb direktorlarının yenidən vəzifəyə qaytarılması məsələsi cəmiyyətdə haqlı suallar doğurur.

“Əgər bir direktor vəzifəsindən uzaqlaşdırılıbsa, bu o deməkdir ki, ya onun əmək müqaviləsinə xitam verilib, ya da fəaliyyəti zamanı ciddi nöqsanlara yol verib. İşdən çıxarılan direktorların 20 faizi - hər beş işdən çıxarılan direktordan biri yenidən vəzifəyə qaytarılırsa, bu artıq ciddi problemdir. Bu, bizim təhsil sistemində kadr ehtiyatı, liderlik potensialı, metodoloji və idarəçilik bacarıqları baxımından ciddi çatışmazlıq olduğuna eyham vurur, nöqsanları göstərir”, - Elmin Nuri bildirib.

Onun sözlərinə görə, ölkədə kifayət qədər gənc müəllim var ki, onlar direktor vəzifəsinə gətirilə bilər:

“Bunu bir kənara qoysaq belə, məktəb direktorlarının işə qəbul müsabiqəsində iştirak edən, test, esse və müsahibə mərhələlərində yüksək nəticə göstərən, hazırda namizəd statusunda olan və bu sahəyə həvəs göstərən kifayət qədər mütəxəssis var. Onlar qala-qala fəaliyyəti zamanı nöqsanlara yol vermiş direktorları yenidən vəzifəyə qaytarmaq heç cür doğru sayıla bilməz”.

Tədqiqatçı hesab edir ki, hazırda gözləmə mövqeyində olan namizədlərlə ayrıca görüşlər keçirilməli, onların yaradıcı yanaşması, idarəçilik baxışları öyrənilməli, bundan sonra qərar verilməlidir:

“Bugünlərdə elə müəllimlər var ki, məktəb rəhbərliyi üçün hazır kadrdır. Onlar olduğu halda, niyə fəaliyyətində nöqsan olan şəxslərdən yapışırıq? Bu, təhsilin keyfiyyətinə də, cəmiyyətin gözləntilərinə də ziddir”-deyə Elmin Nuri bildirib.